DILI, STLNEWS.co – Aproveita tempu ferias ajuda familia hodi buka osan liu husi faan bandeira iha dalan ibun, tanba selebrasaun loron 20 Maiu sura deit loron.
Ba STL Segunda (08/05/2023) iha Hotel Timor nia oin, Estudante Filomena de Araujo hateten, atu komemora loron boot 20 Maiu, tanba nee hanesan estudante iha banku primaria, tenki aproveita oportunidade nee ajuda inan ho aman hodi buka osan liu husi faan bandaeira RTDL, tanba loron 20 Maiu besik daudaun ona.
“Ami feriadu, tanba nee mak hau uza tempu ferias nee hodi mai faan bandeira. Osan neebe hau hetan lori entrega ba inan ho aman hodi sosa ami nia nesesidade. Atividade nee hau halo laos inan aman mak obriga, maibe hau nia hakarak rasik, tanba hanesan oan ida, oinsa atu ajuda netik inan aman sira buka osan,” dehan estudante nee ho oin hamnasa.
Tuir nia, bandeira neebe sira faan ba sosa tutan iha loja Xina nian, bandeira kiik plastik ida isi 20 biji ho presu US$ 2.50, lori mai faan fali iha dalan ibun, kiik nee ida US$ 0,50 sentavu, rendimentu diak, loron ida plastik ida bele hotu, nee hetan US$ 10 i dala ruma hetan deit US$ 8 kada loron, bandeira folin liu mak kiik nee, tanba ema uza motor ho kareta nee mak sosa barak.
Atividade faan bandeira nee sira halo hahu iha loron 1 fulan Maiu, tan nee Filomena sai husi uma iha oras tuku 7 dader no loraik fila ba uma tuku 18:00.
Iha fatin hanesan, Julio Babo hatutan, atividade faan bandeira nee laos foin halo, maibe bainhira atu tama ba selebrasaun loron boot ruma, hanesan 20 Maiu, 30 Agostu no 28 Novembru, sira senpre hola parte faan bandeira iha dalan ibun.
“Ami hakarak faan iha loron importante sira nee, tanba ema sosa diak no rendimentu neebe ami hetan diak tebes, no atividade negosiu nee inan aman la obriga, maibe ami nia hakarak mak mai faan,” dehan estudante nee.
(mad)
