Espoza PR Apoiu Nesesidade Baziku ba Vitima Inundasaun

Espoza Prezidente Republika (PR) Cidalia Nobre Mouzinho Guterres, hamutuk ho ekipa, apoiu nesesidade bazika ba vitima inundasaun neebe mak refuziadu iha eskola Ensinu Baziku Katoliko Primeiru Segundu Siclo Padre Monteiro, Sabraka Laran. (Foto: GAAC-PR)

DILI, STLNEWS.co – Espoza Prezidente Republika (PR) Cidalia Nobre Mouzinho Guterres, hamutuk ho ekipa, apoiu nesesidade baziku ba vitima inundasaun neebe mak refuziadu iha eskola Ensinu Baziku Katoliko Primeiru Segundu Siclo Padre Monteiro, Sabraka Laran.

Bainhira remata vizita no fahe nesesidade baziku, espoza PR ba jornalista hatete, ninia vizita nee mai ho parseiru sira hanesan husi Rede Feto, PLAN International, nomos Komisaun SADIA.

“Vizita ida nee mai hamutuk ho parseru sira hanesan Rede Feto Timor Leste, PLAN Internasional, nomos Komisaun SADIA hodi mai too iha ita nia maun alin inan feton no kiik oan sira, hanesan ita hotu hatene dezastre neebe mak afeita laos iha Dili laran deit maibe kuaze iha Timor tomak tanba, nee mak ami mai iha nee lori ami nia apoiu oituan, hau hanoin sasan sira nee la folin liu maluk balun neebe mak lakon nia familia,” nia hatete.

Nia hatutan, sira neebe mak lakon familia iha tempu inundasaun nee nafatin fo solidaridade ho orasaun atu korajen, no sira neebe mak ba ona mundu seluk nain simu sira nia klamar ba hamutuk iha kadunan santo.

Cidalia afirma, tuir loloos nee atividade halao iha loron Domingo ho Segunda, maibe tanba hotu hotu hasoru inundasaun hotu hanesan mos familia PR nian, tanba nee mak labele halao atividade refere no ohin mak bele realiza.

Iha fatin hanesan vitima ba dezastre naturais, Cesario Ernesto Boavida mos hatoo agradese ba espoza PR nia vizita nee, tanba ho vizita nee bele loke publiku nia matan katak sira hasoru duni dezastre.

“Husi primeira dama nia prezensa sai hanesan dalan ida ou hatudu dalan ida ba publiku rekonese katak ami hetan duni dezastre naturais, tanba ami nia dezastre naturais ida nee laos hanesan ami tuur iha mota, maibe efek husi rai halai tanba nee mak halo hau nia uma estragus total.” katak vitima nee.

Nia hatutan, vitima neebe impaktu husi rai halai deit hela iha Sabraka Laran hamutuk uma kain 5, inklui mos vitima seluk neebe mak mota lori no estragus.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here