Estudante Halerik Ba Pulsa

Magnifiku Reitor Dili Institute of Technology (DIT), Alvaro Menezes. (Foto: STL/Blandina Mauno)

DILI, STLNEWS.co – Magnifiku Reitor Dili Institute of Technology (DIT), Alvaro Menezes husu ba governu liu husi Ministeriu Ensinu Superior Siensia no Kultura (MESSK), atu fo atensaun ba estudante sira nia prosesu aprendizajen liu husi online, nunee estudante sira labele lakon oportunidade iha situasaun serka sanitaria.

“Ida nee importante tebes liu husi media nee hau hakarak hatete, agora universidade lori fila ba uma ona, estudantes sira labele mai, prosesu aprendizajen lao hela, maibe estudantes sira komesa halerik ba pulsa, sei ita lakoi ita nia joven lakon oportunidade atu aprende, governu liu husi MESSK tenke fo dalan ida apoiu mos pulsa ba sira,” dehan Reitor DIT, Alvaro Menezes ba jornalista sira iha Kampus DIT Domingu (21/03/2021).

Nia dehan, nia halo ona proposta ba governu husu apoiu pulsa dolar ida kada loron ba estudante sira, nunee sira bele halao sira nia aula online iha nia fatin.

Hatan ba preokupasaun nee Ministru Ensinu Superior Siensia no Kultura (MESSK), Longuinhos dos Santos hatete, preokupasaun estudante sira nian, MESSK simu ona maibe depende ba planu orsamentu 2021 nian neebe koloka.

“Konaba internet preokupasaun mos husi governu liu liu Ministeriu Ensinu Superior Siensia no Kultura (MESSK), maibe konaba prosesu hirak nee hotu depende ba planu orsamentu ministeriu nian neebe koloka, portantu ida nee hanesan governu tau atensaun mesmu ke ita seidauk iha orsamentu, liu liu ba planu orsamentu 2021 nian ita seidauk iha, maibe governu tau atensaun ba asuntu ida nee,” nia dehan.*

Reportajen: Blandina Mauno
Editor: Ekipa STL

LEAVE A REPLY

Please enter your comment!
Please enter your name here