EUA Kompremitidu Apoiu Dezenvolvimentu Iha TL

Embaixador Estadus Unidus Amerika (EUA) ba Timor Leste, Charles Kevin Blackstone hasoru malu ho Ministru Prezidensia Konsellu Ministru, Fidelis Leite Magalhães, iha Palasiu governu, Tersa (30/3/2021). [Foto: MPKM]

DILI, STLNEWS.co – Embaixador Estadus Unidus Amerika (EUA) ba Timor Leste, Charles Kevin Blackstone informa katak nia parte kompremetidu hakarak apoiu governu Timor Leste liu husi projetu neebe sei halao liu husi USAID no Millenium Challange Corporation (MCC), para lori dezenvolvimentu ba TL.

“Enkontru ho Ministru Prezidensia Konsellu Ministru, iha asuntu barak mak ami koalia, hanesan hau mai atu partilla asuntu importante ho Ministru Fidelis konaba komprimisiu husi EUA atu kontinua servisu hamutuk ho povu no governu Timor Leste,” dehan Embaixador EUA, Charles Kevin Blackstone, hafoin remata enkontru ho Ministru Prezidensia Konsellu Ministru, Fidelis Leite Magalhães iha Palasiu Governu,Tersa (30/03/2021).

Nia dehan, iha enkontru nee mos kolia konaba programa espesifikamente neebe sei implementa liu husi programa neebe USAID no MCC iha.

“Ami koalia programa espesifikamente lima liu husi koooperasaun ho USAID, neebe sei implementa ho orsamentu hamutuk tokon US$ 93, nomos koalia konaba programa Millenium Challenge Corporation (MCC) neebe atu implementa iha Timor Leste, maske iha impedimentu husi pandemia Covid-19 nee maibe presiza halo diskusaun nunee programa nee ba oin bele lao para konkretija planu neebe iha ona,” dehan nia.

Iha Fatin hanesan Ministru Prezidensia Konsellu Ministru, Fidelis Leite Magalhães katak, iha previleiju neebe boot tanba bele halao primeiru sorumutu ho Embaixador Estadu Unidus Amerika (EUA) neebe foin mak hahu mandatu nia iha Timor Leste.

“Sorumutu ida ohin nee hanesan atu fahe hanoin, no rona mos impresaun husi lideransa sira husi Washington DC nia hanoin konaba prosesu dezenvolvimentu iha Timor Leste,” informa nia.

Fidelis haktuir, EUA kontinua kompremetidu atu apoiu dezenvolvimentu ba Timor Leste, tanba nee ho prezensa Embaixador EUA ba Timor Leste nee espera iha tempu oin mai nasaun rua sei bele hakat liu tan ba faze dezenvolvimentu neebe diak liu husi koooperasaun neebe nasaun rua nee iha.

“Hanesan projetu dezenvolvimentu neebe dadaun nee lao hela liu husi USAID – MCC, no iha mos programa mak hanesan oferese bolsu estudu ba Timor oan sira neebe dadaun nee kontinua lao hela,” teknik nia.

Antes nee embaixador EUA ba Timor Leste, Charles Kevin Blackstone, halao ona enkontru dahuluk ho Primeiru Ministru (PM) Taur Matan Ruak hodi rona Primeiru Ministru nia planu prioridade, tanba nee EUA hakarak halo kooperasaun governu ho Timor Leste para responde planu prioridade neebe Xefe Governu hatoo.

“Ohin hau anunsia ona programa kooperasaun ho USAID nian ba tinan lima neebe ho orasamentu montante tokon US$93, ami nia programa foun nee sei fokus ba dezenvolvimentu ekonomiku, dezenvolvimentu iha sosiedade neebe konsentra ba grupu joven no feto sira ho grupu hirak neebe fulneravel marjinalizadu,” dehan Charles hafoin soromutuk ho Primeiru Ministru iha Palasiu Governu, Kinta (25/03/2021).

Nia hatutan, programa ida nee sei halo kooperasaun ho Ministeriu hotu iha VIII Governu nian, hodi bele responde no atinje prioridade sira neebe estabelese husi governu Timor Leste.

Hanesan publiku hatene katak programa husi USAID nian hanesan parte ida husi programa lubuk ida estadu unidus oferese ba Timor Leste, no programa neebe oferese husi embaixada no korpu da paz ho mos forsas armada militar EUA, apoiu neebe fo ba TL, tanba pais rua kompartilla fahe ba malu valores no prinsipiu sira neebe hanesan, purezemplu komprimisiu ba prosesu demokratiku protesaun ba direitu umanu no ba governasaun diak.

Aleinde ida nee mos, embaixador EUA iha Timor Leste sei planeia hela atu tau tan orsamentu balun atu hodi kombate surtu pandemia Covid-19 neebe Timor mos infrenta.

“Hau mos mensiona konaba apoiu importante lubuk ida EUA fornese ona ba TL iha area ba saude nian, ami tau ketak osan balun atu fo apoiu ba parte asistensia Covid-19 nian, defaktu ami fornese ona osan hamutuk tokon US$1,6 signifikamente ba Covid-19 no ami planeia hela atu fornese tan,” tenik nia.

Orsqmentu neebe EUA fo nee atu apoiu inisiativa governu nian atu hatoo informasaun ba publiku konaba prevensaun Covid-19 no mos parte seguransa fronteira nian.*

Reportajen: Alberto Menezes
Editor: Crisogono Magalhães

LEAVE A REPLY

Please enter your comment!
Please enter your name here