Evita Hamlaha, Governu Dezloka Estudante Ba Munisipiu

Deputadu bankada FRETILIN, Dario Madeira. (Foto: Espesial)

DILI, STLNEWS.co – Relasiona ho akontesementu inan feton ida neebe tara aan tanba laiha hahan, deputadu husi bankada FRETILIN husu governu halao teste swab ba estudante sira hotu, hare rezultadu negativu dezloka sira ba munisipiu ida-idak hodi evita hamlaha.

Kestaun nee hatoo husi Deputadu bankada FRETILIN, Dario Madeira ba STL via Messenger, Sabadu (03/04/2021).

“Se inan feton nee tara aan tanba hamlaha, tuir hau mak nee, governu tenke halo teste swab ba estudante sira hotu-hotu husi munisipiu, no haree rezultadu negativu tenke haruka fila ba idak-idak nia munisipiu hodi evita ema hamlaha”, informa Deputadu Dario Madeira.

Nia dehan, hanesan deputadu, haree ba inan feton neebe mate presiza investiga nia kauza loloos, tanba nia mate tiha ona, ka nia husik hela mensajen ba ema ruma kalae, presiza haree didiak lai.

Tuir nia, maibe se loos duni mate tanba laiha hahan mak governu tenke teste swab ba estudante sira, atu nunee estudante sira neebe mai husi munisipiu, fila ba hamutuk ho sira nia inan aman, labele sofre ba hahan laiha.*

Reportajen: Guilhermina Franco
Editora: Josefa Parada

LEAVE A REPLY

Please enter your comment!
Please enter your name here