Expo Dubai, Setor Privadu Kongratula Governu

DILI, STLNEWS.co – Setor privadu kongratula governu, tanba iha hela situasaun difisil ka pandemia surtu Covid-19, maibe nafatin halo esforsu atu partisipa iha Expo Dubai.

“Ami kongratula tanba governu hakarak Timor Leste (TL) partisipa iha Expo Dubai, tanba bele lori TL nia imajen ba promove iha rai liur, no fiar katak tempu ida investor sira sei mai investe iha rai laran, benefisiu husi expo nee laos atu hetan kedas, maibe buat hotu sei lori tempu,” informa Prezidente Camara Comersiu Industria TL (CCI-TL) Oscar Lima ba STL Tersa (14/09/2021) iha nia knaar fatin Comoro.

Nia afirma, atu dada investor rai liur mai investe iha rai laran, mak TL tenke lori nia imajen ba faan uluk lai, karik investor sira laran monu, mak tempu ida sira sei mai investe, tanba nee TL tenke faan duni imajen ba liur, TL nasaun ida neebe kiik no foin mak ukun an tinan 20, tanba nee nasaun barak mak seidauk konese diak TL, nunee liu husi expo sira nee bele promove imajen TL nian iha neeba.

Tuir Oscar Lima katak, governu aproveita oportunidade neebe diak, tanba halo esforsu boot hodi TL bele partisipa iha Expo Dubai, no expo nee nasaun barak mak sei partisipa, setor privadu sira mos sei marka prezensa iha Expo nee, fiar katak setor privadu husi TL mos bele halo parseria ho nasaun seluk hodi lori mos investor mai investe iha TL.

Iha parte seluk, Domingos Ximenes hanesan juventude hatutan, diak liu governu labele estraga osan ba Expo Dubai, tanba retornu ba TL laiha, tanba osan neebe governu aloka ona ba Expo nee, diak liu hadia deit povu nia moris, labele uza berfoya fali iha liur, serake povu TL hasoru hela problema hamlaha, balun sei hela iha tenda okos.*

Reportajen: Madalena Horta/Jacinta Sequira

Editor: Ekipa STL

LEAVE A REPLY

Please enter your comment!
Please enter your name here