Ezekusaun OJE Foin 20%, Labele Gasta La Benefisia Povu

DILI,STLNEWS.co – Tuir Monitorizasun Sosidade Sivil nian ba ezekusaun Orsamentu Jeral Estadu (OJE) 2023 nian, too iha Maiu foin atinji 20%. Ezekusaun husi orsamentu total nee kiik, maibe diak liu la ezekuta duke estraga deit ba programa neebe la ajuda redusaun problema povu nian.

Kestaun nee fo sai husi Koordenador Lao hamutuk, Celestino Gusmao ba STL, Kuarta nee (24/05/2023).

“Hau haree ezekusaun nee foin 20%, husi total orsamentu ezekuta kiik, tanba nee diak liu labele ona ezekuta, duke estraga deit ba programas neebe la ajuda atu redus problema estruturais povu nian,” dehan nia.

Nia afirma, osan bele aprova husi membru Parlamentu Nasional (PN), maibe atu ezekuta ho diak nee depende ba nesesidade, kuandu kaixa tezouru governu nian menus husi tokon US$ 200, governu husu levantamentu.

Se la presiza osan nafatin iha fundu petroliferu neebe investe iha merkadu finanseiru internasional.

Iha Parte seluk, Diretor Ezekutivu FONGTIL, Valintim da Costa Pinto (KOKO) hateten, tuir portal transferensia governu nian, too iha mediu fulan Maiu nian, governu ezekuta ona 20%, tanba nee konsidera ezekusaun nee kiik los.

“Ami konsideira komportamentu ezekusaun tinan ida nee kiik tebes, tanba besik metade tinan ida nee nian, maibe ita nia ezekusaun nee kiik tebes, no bainhira atu metade tinan ida nee remata mak ezekusaun nee kiik tebes,” dehan Direitor Ezekutivu nee.

Nia afirma, mandatu governu ida nee besik remata ona, tanba nee diak liu osan neebe sei iha nee labele gasta ona ba servisu neebe la fo benefisiu ba povu, tan nee diak liu husik ba governasaun neebe mai nee bele kontinua.

(mad)

LEAVE A REPLY

Please enter your comment!
Please enter your name here