Ezistensia Pandemia Dezempregu Aumenta

Ezistensia Corona virus ka Covid-19 iha mundu, afeita tebes ba ema hotu nia moris, inklui povu iha nasaun Timor Leste. (Foto: GSE)

DILI, STLNEWS.co – Ezistensia Corona virus ka Covid-19 iha mundu, afeita tebes ba ema hotu nia moris, inklui povu iha nasaun Timor Leste.

Pandemia nee halo ema barak moris iha susar nia laran no pior liutan wainhira mosu pandemia nee sakrifika ema neebe iha ona servisu, tenke lakon nia servisu.

Tuir Juventude Costarico Pereira Gomes katak, Timor Leste nudar nasaun sub desenvolvidu, neebe antes nee maioria juventude mak laiha empregu ka laiha servisu. Nunee bainhira mosu virus nee, situasaun nee aumenta pior liutan.

“Ita hatene katak maioria juventude mak laiha empregu ka laiha servisu. Pior liutan wainhira mosu pandemia Covid-19 nee, sakrifika tan ema neebe iha ona ka empregado barak mos tenke lakon empregu, liliu sira neebe servisu iha instuituisaun privadu sira, kompania tenke hapara kontratu de servisu, mesmu la tuir prosedur lei sindikatu traballador nian, tanba faktor saude, sirkulasaun ekonomia global no rai laran neebe paradu total. Nunee kompania la hetan retornu no laiha osan atu selu traballador sira. Tanba nee atu konklui deit katak, ho ezistensia pandemia nee lapangan kerja semakin sempit i aumenta numeru desempregu iha TL,” dehan nia ba STL iha Comoro, Dili, Segunda (30/11/2020).

Nia hatutan, atu rekopera fila fali situasaun nee, ukun nain sira tenke hamutuk hodi hanoin saida mak atu halo, para hadia fali povu kiik sira nia moris. Liliu ba sira neebe lakon servisu iha tempu corona virus nee.

Iha biban nee Costarico rekomenda ba estadu no governu, tenke reforsa komitmentu rekoperasaun ekonomia rai laran. Alende nee setor publiku, governu presiza apoiu makas, nunee bele fo espasu kampu de servisu ba Timor oan neebe laiha no lakon servisu durante periodu pandemia nee.*

Reportajen: Domingas Gomes
Editora: Carme Ximenes

LEAVE A REPLY

Please enter your comment!
Please enter your name here