DILI, STLNEWS.co – Oras nee iha dalan ibun labarik too ema boot kaer Bandeira Republika Demokratika Timor Leste (RDTL) faan ba sidadaun sira neebe halao movimentu ba mai, tanba faan bandeira fo rendimentu diak ba negosiente kiik sira iha dalan ibun.
“Hau faan bandeira nee hetan redimentu diak, tanba nee wainhira loron 20 fulan Maiu hau tenki faan,” hatete negosiante faan bandeira, Agosto da Silva Kolo ba STL iha Portu Dili nian oin, Segunda nee (09/05/2022).
Nia dehan, faan Bandeira RDTL fo benefisu diak ba rendimentu, tanba ema hotu-hotu hakarak hola bandeira hodi hasae iha uma oin, liu-liu iha kareta oin no mos motor oin.
Iha fatin hanesan, Jildo do Carmo neebe faan Bandeira RDTL iha Banco Mandarin nian sorin informa, Bandeira RDTL nee sira faan iha loron 20 fulan Maiu besik ona, maibe loron baibain sira faan ema la sosa.
“Ami faan nee iha loron importante hanesan komemora loron restaurasaun independensi nee, tanba ema barak mak hakarak sosa bandeira atu hasae iha kareta oin, no mos motor, tanba nee ema hadau malu, depois bandeira ida ho folin O,50 sentavus no mos US$ 1 deit,” nia afrima.
(jen)
