DILI, STLNEWS.co – Kada loron Rosalino Correia la senti kolen faan pentolan tama sai bairu iha kapital Dili, tanba liu husi atividades hirak nee bele hetan rendimentu sustenta familia.
“Ami faan pentolan nee tama sai iha bairu-bairu, liu fatin neebe mak ema sempre sosa pentolan husi ami, loron ida ami lori pentolan nee ba faan too US$ 20, ami faan tama sai bairu, loroik mak fila uma dala ida,” dehan Rosalino ba STL, Sabadu nee (23/07/2022).
Rosalino dehan, faan pentolan too ema sosa hotu foin fila ba uma, sira la faan ema nian, maibe sira halo rasik pentolan mak faan, tanba faan ema seluk nian nee hetan osan oituan deit, sira nain tolu ou haat neebe mak faan nee fahe malu.
Nunee mos Manuela de Jesus hanesan ema neebe sosa pentolan hatete, labarik sira nee kada loron lori pentolan mai faan iha area Hudi Laran no labarik kiik barak gosta bolu no sosa pentolan neebe sira faan.
“Hau sosa beibeik pentolan neebe mak sira faan, tanba labarik sira mos gosta han pentolan, nee hau tenki sosa duni,” afirma nia.
(jac)
