Fahe Osan Laos Rekuperasaun Ekonomia

Deputadu sira iha uma fukun Parlamentu Nasional (PN), preokupa ho politika governu atu distribui ai-han ho osan ba populasaun, tanba asaun hirak nee laos parte husi rekuperasaun ekonomia. (Foto: Media PN)

DILI, STLNEWS.co — Deputadu sira iha uma fukun Parlamentu Nasional (PN), preokupa ho politika governu atu distribui ai-han ho osan ba populasaun, tanba asaun hirak nee laos parte husi rekuperasaun ekonomia.

Preokupasaun nee hatoo husi Segundu Vise Parlamentu Nasional (PN) atual Deputadu Bankada KHUNTO Luis Roberto, Tersa nee iha PN, liu husi nia intervensaun, bainhira governu aprezenta planu no programa rekuperasaun ekonomiku iha PN.

“Koalia dehan rekuperasaun ekonomiku iha TL deside inisiu too ohin loron, ita seidauk iha planu neebe diak no fiksu atu hatur ekonomiku loo-loos, hahu husi governu anterior too ohin loron, ita atu rekupera maka ida neebe, ita haree durante implementasaun EE ita distribui ai-han no osan ba ita nia komunidade, nee laos parte rekuperasaun ekonomiku,” katak Luis.

Tuir nia atende emerjensia atu prevene moras tanba evita sira nia movimentu, governu distribui osan tanba limitasaun sirkulasaun populasaun, governu iha responsabilidade moral atu halo rekuperasaun ekonómiku ba futuru nee maka saida atu hadia setor ida neebe maka prinsipal, tanba TL agora seidauk iha fabrika hodi produs buat ruma.

“Ita nia ekonomiku tun ba 6% bele tun mos ba 0 % bele akontese bainhira ita la hadia iha futuru, ita presiza kria kondisaun neebe diak kria fabriku hodi produs buat ruma hodi fo vontade na ita nia povu agrikutor sira,” argumenta Luis.

Hatan ba kestaun nee Ministru Koordenador Asuntu Ekonomiku, Joaquim Amaral hatate, Governu foti komponente faze emerjensia neebe Parlamentu aprova ona fundu COVID-19. Kualker krize presiza periodu tranzisaun ida atu fila ba normalidade, tanba nee presiza medidas neebe governu foti atu bele halo nia ekonomia fila ba normalidade.

Ministru Asuntu Ekonomia nee hatutan, medidas faze emerjensia nian liu ona balun nia ezekusaun sei lao hela no foin tama iha segunda faze konesidu ho planu rekuperasaun ekonomia nia orsamentu mai husi orsamentu 2020 neebe foin aprova.*

Reportajen: Guilhermina Franco / Domingas Soares
Editor: Ekipa STL

LEAVE A REPLY

Please enter your comment!
Please enter your name here