Fidelis: Osan Funan Diak, Governu Lakoi Ansi Foti Lalais Osan Iha Banku Federal Amerika

Ministru Prezidensia Konsellu Ministru (MPKM) Fidelis Leite Magalhães. (Foto: MPKM)

DILI, STLNEWS.co – Ministru Prezidensia Konsellu Ministru (MPKM) Fidelis Leite Magalhães hateten osan neebe governu investe iha Banku Federal Amerika dadaun nee funan diak nunee husik lai ba, hafoin osan rezerva neebe iha governu iha hotu mak sei halo levantamentu.

Tuir nia, wainhira Timor Leste investe osan iha Banku Federal Amerika neeba husi tempu ida ba tempu seluk osan nia funan sempre tun sae, maibe iha momentu ida nee osan nia funan diak.

“Husi tempu ba tempu osan nia funan sempre tun sae, maibe momentu ida agora osan nia funan diak, tanba nee husik tia lai nunee ita bele hetan osan nia funan,” dehan nia iha Palasiu Governu, Sesta (08/01/2021).

Fidelis dehan, dadaun nee governu sei iha osan rezerva tanba nee la presiza atu halo levantamentu lalais ba Orsamentu Jeral Estadu (OJE) 2021.

“Tanba wainhira ita foti lalais mak ita sei lakon retornu investimentu neebe Timor Leste sei hetan, tanba nee desijaun neebe governu halo nee klaru ona, tanba osan neebe iha Banku Federal Amerika neeba agora funan aas tebes,” nia esplika.

Antes nee Ministru Finansas (MF) Rui Gomes mos hateten dadaun nee seidauk nesesariu autoriza Banku Central Timor Leste (BCTL), hodi halo levantamentu Orsamentu Jeral Estadu (OJE) 2021 nian.

“Ministeriu Finansas hanoin katak seidauk iha nesesidade atu halo pedidu ba Banku Central Timor Leste tanba ita nia Osan sei iha por volta millaun $325 nunee la presiza halo pedidu,” dehan Ministru Finansas Rui Gomes hafoin remata enkontru Primeiru Ministru (PM) Taur Matan Ruak iha Palasiu Governu Dili, Tersa, (05/01/2021).

Nia dehan, governu atu halo pedidu ba Banku Central Timor Leste hodi halo levantamentu OJE 2021 wainhira orsamentu liqides menus ona husi millaun $200.

“Tanba nee ami sei monitoiza loron loron, wainhira likides nee menus ona husi millaun $200, governu sei halo pedidu ba BCTL hodi halo levantamentu OJE 2021,” nia esplika.

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here