DILI, STLNEWS.co – Reprezentante povu iha uma Fukun Parlamentu Nasional,(PN) husu ba governu atu toma atensaun no dezenvolve diak liu tan foho Matebian, tanba fatin nee Istoriku tebes, no sai mos fatin turizmu relijiozu nian.
“Hau hanoin governu tenke toma atensaun ba foho Matebian neebe lokaliza iha Baucau Quelikai, tanba fatin nee istoriku tebes, tanba nee presiza kondisaun neebe diak, hanesan estrada no dezenvolve mos fatin nee sai diak,” kestaun nee fo sai husi Deputada Gabriela Alves iha Parlamentu Nasional, Kuarta nee (01/09/2021).
Nia afirma, foho Matebian nee iha istoria barak, hanesan mos Kristu Rei, tanba nee husu ba governu atu identifika fatin istoriku sira nee, bele halo sai ba fatin turizmu, tanba nee tenke kria kondisaun neebe diak, liu liu estrada no fasilidade sira seluk iha fatin nee.
Iha fatin hanesan Deputadu Abel Pires hatutan, fatin sira neebe mak uluk sai ona hanesan istoriku ba luta ukun rasik an ida nee, tenke dezenvolve halo diak, liu liu kria kondisaun neebe diak, atu nunee bain hira Covid-19 nee hotu ona karik bele atrai vizitor sira ba pasa tempu.
“Hau hanoin ita tenke dezenvolve fatin istoriku sira nee halo diak, oinsa hadia estrada halo diak, hodi fasilita transporte sira bele too iha fatin sira nee ho diak,” dehan Deputadu nee.*
Reportajen: Madalena Horta
Editor: Ekipa STL
