LAUTEM, STLNEWS.co – Governu hatun ona taxa importasaun husi 5% ba 2,5% hodi normaliza presu sasan, maibe realidade folin foos kontinua sae iha Munisipiu Lautem.
“Ami iha Lautem foos folin kontinua sae, 25 kg nee folin US$ 20, 20 kg US$ 18, ita sosa labele ona,” hatete komprador Vitor do Santos Gabral ba STL iha Lospalos Kota, Kinta (31/08/2023).
Nia dehan, objetivu IX Governu hatun ona taxa importasaun husi 5% ba 2,5% hodi normaliza presu sasan, maibe realidade sasan folin kontinua sae iha merkadu.
“Ita nia governu hatun ona taxa tenki normaliza folin sasan, atu nunee ami bele hola hodi han, ami senti tristi tebes bainhira foos folin kontinua sae iha Munisipiu Lautem,” nia tenik.
Iha fatin hanesan, Komunidade Carlito do Carmo esplika, folin foos iha Lospalos sae makaas, tanba nee komunidade senti tristi tebes, tanba foos agora karun, uluk 20 kg US$ 12, 25 kg 14 no 30 kg US$ 16, maibe agora 20 kg US$ 18, 25 kg US$ 21, 30 kg agora laiha ona,” nia tenik.
Nunee mos reprezentante povu iha uma fukun Parlamentu Nasional (PN), Deputadu Bankada FRETILIN, Dario Maderia informa, hakarak koalia hanesan esperensia ida uluk OJE 2023 kuandu hahu debate iha PN, bainhira negosiante sira rona dehan hasae taxa, folin sasan hotu-hotu iha kios ka loja sira nee sae hotu dala ida iha momentu nee kedas, maski OJE PR seidauk promulga.
“Maibe agora nee oin seluk fali, debate OR lao tiha ona kuaze atu tama ona semana 1, mais sasan folin nunka ida tun, laiha impaktu ida ho debate OR, maski ita hatun ona taxa husi 5% tun ba 2,5% nia impaktu laiha liu,” nia esplika.
Nia deklara, hakarak husu governu nia resposta nee saida iha hatun taxa nee, objetivu hatun taxa para asegura komunidade ka povu kiik sira neebe mak durante iha ninia esperansa ba governu katak, hatun taxa nee rezolve ona sira nia problema ho folin sasan neebe karun iha merkadu.
(jen)
