Folin Fos Komesa Sae

Foto: Espesial

DILI, STLNEWS.co – Presu fos neebe negosiante sira faan iha Munisipiu komesa sae ba $14, tanba fos iha armajen la iha.

Duarte dos Santos, hanesan loja nain Jamdi, husi Munisipiu Covalima hatete, agora dadaun folin fos hahu sae, tanba sira neebe loja kiik faan iha munisipiu, sira sosa tutan husi loja boot sira neebe mai sosa nesesidade iha armajen boot Dili. Sira mai sosa fos lori ba munisipiu mos sosa uituan deit, tanba fos iha armajen mos hahu menus no ema faan terbatas.

“Hau hanoin ita nian folin fos agora dadaun hahu sae, ita kompara ho uluk presu fos nee lao normal hela, maibe bainhira fos menus iha armajen, entaun ami neebe sosa tutan fos nee mos hasae uituan folin, para ami bele manan netik 50 cent, tanba ami mos sosa tutan husi maluk sira seluk mak ami faan fila-fali. Fos 25 kg antes nee ami sosa 12 dolar 50 cent, maibe agora ami sosa $13 dolar 50 cent, depois ami faan fali $14 dolar,” dehan Duarte ba STL, bainhira sosa sasan iha Colmera, Dili, Kuarta (13/01/2021).

Duarte akresenta, uluk presu sei normal nee fos 20 kg sira sosa ho presu $10 dolar 50 cent, maibe agora sae ba $11 dolar resin, ho ida nee sira faan fali $12 dolar resin, tanba sira mos sosa tutan husi ema seluk. Loja boot faan fali fos ba sira, maibe la hatene fos mak laiha ka oinsa, maibe presu labele hasae demais, tanba ho situasaun Covid-19 durante nee ema barak mos lakon sira nian servisu.

“Ita faan sasan labele hasae demais ba ita nian maluk sira, tanba ita hatene katak, ho situasaun Covid-19, nee hau hanoin ita nian maluk barak too agora seidauk hetan servisu, tanba laiha projetu ruma neebe halao iha Munisipiu.

Ami nian rendimentu mos kada loron menus, se ita halo komparasaun uluk kada loron ami sei hetan rendimentu neebe mak diak, maibe hafoin ita hetan Covid-19, ami mos ladun hetan rendimentu,” dehan nia.

Iha parte seluk Fernanda de Jesus, hanesan konsumedor dehan, los duni katak, folin fos komesa sae, tanba horseik loraik nia rasik ba sosa fos iha loja komesa sae, tanba fos tali merah 30 kg, sae ba $16 dolar, maibe uluk nee $15 dolar agora hasae ba $16 dolar, la hatene folsom nee hira.

“Ita la hatene tanba saida mak ita nian folin fos komesa sae iha merkadu, uluk fos 25 kg nee $13 dolar deit, maibe la hatene agora sae ba hira, maibe loja kiik sira neebe mak faan fos, nee sira sosa tutan husi sira nian maluk sira seluk, entaun sira faan depende ba presu fos neebe sira sosa tutan husi ema seluk,” nia dehan.*

Reportajen: Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here