Folin Nesesidade Bazika Aumenta

DILI, STLNEWS.co – Presu nesesidade baziku, liu-liu fos iha merkaduria kada loron aumenta ba bei-beik, hodi halo komunidade neebe laiha rendimentu labele kompra sasan hirak nee.

Xefe Suku Caikoli, Hipolito Marques Sarmento hatete, programa sesta bazika nee diak atu apoia aihan ba uma kain sira, maibe realidade povu iha aldeia tolu iha suku Caicoli seidauk hetan sira nia direitu asesu ba aihan ho folin $50 kada ema.

“Hau rasik mos ba sosa sasan iha lojas, sasan nesesidade bazika sira nia folin haksoit aas ona. Foos saka 25 kg, neebe uluk folin $11,50 agora folin sae ba $15. Ita la fo sala empreza sira tanba ita nia sasan sira mai husi liur selu tan karun ou ita nia estadu husu tasa karun, entau kompania sira mos faan tuir ida nee,” hatete Hipolito ba jornalista sira iha Sede Suku Caicoli, Kinta (11/03/2021).

Nia dehan, aldeia tolu neebe seidauk simu aihan mak hanesan aldeia Sacoco, aldeia Foho Rai Boot, aldeia Tahu laran, neebe ho populasaun kuaze 3,000 resin tanba total populasaun iha suku Caicoli hamutuk nain 5,971.

Autoridade lokal nee hatutan, populasaun seidauk simu tanba produtu lokal laiha ona, no situasaun iha kapital Dili neebe aplika serka sanitaria. Programa sesta bazika ou fahe aihan ba komunidade nee diak, maibe komplikadu no despeza operasional boot kompara ho fo subsidiu ba uma kain sira tanba kompania implementador sira mos tenke hetan lukru.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here