DILI, STLNEWS.co – Presu nesesidade baziku folin hahu sae makaas iha merkadu rai laran, liu liu fos neebe antes nee kg 25 ho presu US$ 13, agora sae ona ba US$ 14.50 sentavu saka, no 35 kg sae ona ba US$ 17.50 kada saka, no 20 kg ho presu US$ 11.50 sentavu. Aleinde fos, sasan nesesidade baziku seluk mos folin sae.
Kestaun nee fo sai husi Manajer Loza W-Four, Leonia Ximenes ba STL iha nia knaar fatin Audian, Segunda nee (10/04/2023).
“Folin fos ho sasan nesesidade baziku sira seluk folin hahu sae, laos ami maka manipula folin, maibe ami sosa husi kompanhia importador sira neebe hatama mai nee, folin sae nanis ona, tanba nee ami mos halo mudansa oituan ba presu hanesan fos 25 kg ami hatun ho folin US$ 13, ami faan fali US$ 14.50 sentavu, tanba sura ho kareta nian, tan nee atu dehan deit sasan folin sae kedas husi importador sira,” dehan manajer nee.
Nia katak, sasan folin laos foin sae, maibe kuaze fulan ida ona, dala ruma impkatu husi taxa neebe governu aplika ba kompanhia importador sira, no mina konsumu mak nia folin normal fali ona balun US$ 5,50 sentavu, balun presu US$ 6, presu sira nee normal fali ona, no sedap agora daudaun sae ona ba US$ 8.50 sent, mantolun hare ba nia tipu, balun predu $ 4.50 sent no balun US$ 3.50 sentavu no masin midar ho presu US$ 80.
Iha fatin hanesan, Carmelita da Costa hanesan komprador hatutan, knaar governu nian tenki halo kontrola iha baze, tanba sasan hotu hotu agora daudaun folin sae makaas tebes iha merkadu rai laran, tan nee implika ba povu kiik neebe laiha servisu atu sosa.
“Governu hasae taxa la apar ho kondisaun moris povu nian, ema balun loron ida han dala ida, tanba ekonomia, rendimentu trabalhador kontinua lao ho salariu minimu, funsionariu balun sei lao ho salariu minimu, oinsa atu sosa fos ba konsumu, tanba nee husu ba governu kontrola folin sasan iha merkadu,” nia dehan.
Nia katak, sasan neebe sae iha merkadu rai laran nee laos masin midar, tabaku no alkohol sira nee, maibe 9 bahan pokok folin sae hotu ona, kontrola governu nian nee oinsa.
(mad/jen)
