Fornesedor Sesta Bazika Seidauk Hetan Pagamentu

Foto: STL/Donaciano Magalhães

DILI, STLNEWS.co – Parlamentu Nasional kestiona kapasidade governu, tanba too agora seidauk halo pagamentu ba kompania fornesedor ba programa sesta bazika.

Liu husi Sesaun Plenaria, Tersa (16/03/2021), Deputadu Jose Virgilio husi bankada CNRT, hateten, kapasidade governu nian too iha neebe ona, tanba kompania fornesedor ba programa sesta bazika, balun too agora seidauk hetan pagamentu husi governu, ida nee atu hamate kompania sira sekuandu governu la halo pagamentu.

“Ita preokupa tebes ho kapasidade governu ida nee nian, tanba programa sesta bazika kuaze remata ona, maibe kompania distributor sira seidauk hetan pagamentu husi governu, aleinde sesta bazika iha mos projetu balun neebe too agora governu seidauk halo pagamentu, tan nee husu governu atu toma atensaun,” dehan Deputadu nee.

Nia mos afirma liu tan, kapasidade governu ida nee nian too iha neebe ona, no tanba sa mak too agora governu seidauk halo pagamentu ba kompania fornesedor sira nee, osan maka laiha ka ou kapasidade governu.

Iha fatin hanesan Deputadu Antonio da Conceição hatutan, karik kompania fornesedor ba programa sesta bazika seidauk hetan pagamentu, mak governu tenke toma nota oinsa halo pagamentu.*

Reportajen: Madalena Horta
Editora: Domingas Gomes

LEAVE A REPLY

Please enter your comment!
Please enter your name here