Fretilin Kontra Programa AMP

Bankada CNRT iha Uma Fukun Parlamentu Nasional (PN) kestiona bankada Fretilin neebe vota kontra programa AMP VIII no Orsamentu Jeral Estadu (OJE) 2018, 2019 ho 2020 iha Janeiru, ikus mai sai anju hodi viabiliza governu. (Dok: STL)

DILI, STLNEWS.co – Bankada CNRT iha Uma Fukun Parlamentu Nasional (PN) kestiona bankada Fretilin neebe vota kontra programa AMP VIII no Orsamentu Jeral Estadu (OJE) 2018, 2019 ho 2020 iha Janeiru, ikus mai sai anju hodi viabiliza governu.

Liu husi deklarasaun Bankada CNRT Deputadu Gabriel Soares deklarasaun polítika CNRT atu responde ba akuzasaun husi Bankada Fretilin nian katak, CNRT iha situasaun post power syndrome”. Post power syndrome neebe nuudar moras psikoljika tanba lakon poder ka pozisaun ruma, sai tiha horis sintoma halo ema defísil atu sés husi ninia realidade lakon ona podér.

Hanesan koligasaun, Aliansa Mudansa Progresu mánan eleisaun antesipada ne’ebé Presidente Partidu Fretilin dekreta liu hosi Presidénsia-Repúblika, fásil tebes ba CNRT, sé kanten podér “karik” husik hela violasaun Konstitusinál lao de’it, importante mak CNRT ukun. Sé CNRT kanten podér no tauk atu lakon poder karik sei la eskolla Primeiru-Ministru ne’ebé la’ós husi CNRT. Nee dehan saída? CNRT aposta ba interese Estadu, no Podér núudar instrument deit atu konkritiza vizãun bo’ot ba soberania Paíz no dezenvolvimentu ba povu doben. “Fretilin sempre orgullu taka sira nia Gânancia ba poder hodi fo sala bei-beik ba CNRT, insulta ho liafuan oi-oin, maske sira kaer dadaun hela ukun ho dalan viabiliza tongka-tongka VIII Governu neebe iha tinan 2018 sira vota kontra Koligasaun AMP ninia Programa, inklui vota kontra orsamentu iha tinan 2018, orsamentu iha tinan 2019, no orsamentu 2020 iha Janeiru 2020”, deklara Deputadu CNRT nee iha sesaun plenaria Segunda (19/10/2020) iha PN.

Nia dehan, povu tomak asiste, deklarasaun ida neebe reflete ba Partidu Fretilin dezde lakon iha eleisaun 2007, falla iha 2017 ho koligasaun Minoria no hetan oportunidade hadau poder iha Maiu tinan 2020 tanba CNRT foti pozisaun abstensaun ba proposta OJE 2020.

Ohin loron, bai-bain ona, partidu Fretilin hakarak hatudu-an sai tiha anju, deklara salva Estadu ho razaun katak lakohi mosu Eleisaun Antesipada, Fretilin konsidera Eleisaun Antesipada sai buat ida neebe TABOO ka Proibidu atu akontese iha Timor-Leste. Enkuantu iha 2018, neebe tuir loo-loos labele akontese Eleisaun Antesipada tanba partidu-tolu asegura hela Maioria Parlamentar iha Parlamentu Nasional, maibe Prezidente Fretilin Francisco Guterres Lú Olo deklara Eleisaun Antesipada hanesan solusaun úniku atu salva Fretilin nia inkapasidade neebe falla atu forma governu neebe seguru no forte.

Nia lembra iha altura neeba, maske CNRT hamutuk ho nia aliadu PLP ho Khunto iha kadeira 35 ho Maioria Parlamentar, maibe Koligasaun ida nee la halo asaltu poder hanesan saída maka Fretilin orkestra hodi akontese iha loron 19 Maiu 2020, ida nee hatudu katak, CNRT sempre kumpre Konstituisaun no laas ambisiozu no la Kanten ba Poder, ka sofre moras Post power Syndrome.

Pelu kontrariu, faktu hatudu hadau no asalta poder iha PN mostra katak Fretilin maka sofre hela moras Post Power Syndrome nee dezde lakon poder iha 2007. Fretilin nia moras Post Power Syndrome ida nee maka dudu Fretilin halo violasaun ba Konstituisaun hodi harii VII Governu minoria, no dudu Fretilin halo Asaltu Poder iha Parlamentu Nasionál hodi hamosu VIII Governu Tongka-Tongka ka ho termu Viabiliza neebe la hakerek iha Konstituisaun Repúblika.

Sintoma no sofredor ba Post Power Syndrome hatudu mos husi negasaun Partidu Fretilin nian ba realidade dezenvolvimentu sosio-ekonomiku no kultuaral nasaun ida nee nian dentru tinan 10 nia laran. Sei fresku hela iha memoria, hafoin mosu krize boot iha tinan 2006, Timor-Leste monu ba iha situasaun difísil tebes, Timor-Leste sai nasaun frájil.

Graças a Deus hamutuk rai-lulik no Matebian sira no Maun Bo’ot Kay Rala Xanana Gusmão, CNRT rekupera hikas situasaun krize polítika no militar iha de’it dentru tinan-rua nia laran. Nune’e iha tinan 2009 refujiadu rihun-atus ba atus lori hikas ba sira nia uma, fó pensaun no subsídiu ba veteranus sira, subsídiu ba konfísoens relijiozu neebe ema balun uluk nega sira-nia partisipasaun ba Luta libertasaun nasional, ferik-katuas simu subsídiu, bolso de mãe, bolso estudus ba Timor-oan sira liu husi Fundu Dezenvolvimentu Kapital Umanu, subsídiu ba universidade publiku no privada, harii sentru kultural, projetu empregu rural, infraestrutura eskolas, saude, eletrisidade, irigasaun, estradas no seluk-seluk táb. Polítika ida-ne’e mak manifesta planejando com base na humanidade, ema sai sentru ba dezenvolvimentu sosio-ekonomiku no kultural.

Hatan ba kestaun nee Deputada Fretilin Lidia Norberta hatete, iha politika tenke simu realidade katak husi demokrasia mak povu julga, afinal CNRT halo sala nee mak faktus sai opozisaun, neebe atu dehan iha tempu ida sei iha governu no tempu ida sei iha opozisaun, maibe kestaun mak nee prontu kalae? CNRT dehan liafuan ladiak bainhira Fretilin hatete katak post power symdrome nee ladiak, maibe prontu kalae atu simu opozisaun”, nia dehan.

Nia parte kontra deklarasaun politika CNRT nian, tanba CNRT nia hakarak durante nee atu halai ba eleisaun antisipada maibe la konsege. ” Ami vota kontra nee atu dehan katak cek and balance mak ida nee, neebe normal bainhira bankada opozisaum vota kontra programa ho OJE, maibe lanormal mak bankada governu nian mak vota kontra OJE, ida nee bunuh diri sendiri, hanesan bola ida karik ita ba joga akontese auto golu, hatama rasik golu ba hau nia baliza ida nee mak ladiak,” tenik Lidia.

Tuir Deputada Fretilin nee katak, cek and balance tenke iha kuandu iha opozisaun tenke barani ba nia pozisaun defende nia prinsipiu ho buat neebe mak iha.*

Reportajen: Guilhermina Franco/ Domingas Soares
Editora: Ekipa STL

LEAVE A REPLY

Please enter your comment!
Please enter your name here