Gabinete PR Apoiu Nesesidade Baziku Ba Vitima Inundasaun Hera

Xefe Casa Sivil, Francisco Maria de Vasconcelos. (Foto: STL/Emerenciana Pinto)

HERA, STLNEWS.co – Gabinete Prezidensial Republika liu husi Xefe Casa Sivil, Francisco Maria de Vasconcelos nomos espoza Prezidente Republika, Cidalia Nobre Mouzinho Guterres, ho parseiru Rede Feto, PLAN International nomos Fundasaun SADIA vizita no fahe nesesidade vaziku ba vitima inundasaun neebe oras nee refujiadu hela iha Seminario Canossiano Bedik Hera, nomos refujiadu neebe hela iha Escola Brimob, Mota Kiik.

Bainhira remata fahe besesidade baziku ba vitima sira, Xefe Casa Sivil Francisco Maria de Vasconcelos ba STL iha Hera, Kuarta (07/04/2021) hatete, Prezidente Republika hakarak fo solidaridade ba vitima sira, tanba nee mak mobiliza Gabinete Prezidensial apoiu nesesidade ba populasaun sira.

“Objetivu primeiru mak Prezidente Republika hakarak espresa ninia solidariedade no hakarak apoiu ba populasaun neebe mak afetadu ba dezastre naturais ida nee, tanba nee mak Prezidente Republika, GAAC, no mos mobiliza mai husi PLAN International mos akompana para atu distribui sasan nesesidade baziku neebe mak populasaun sira presiza, ee mak objetivu importante katak Prezidente Republika tau matan too iha povu neeba.” katak Xefe Casa Sivil.

Nunee mos espoza PR Cidalia Nobre Mouzinho Guterres, liu husi diskursu hatete sira nia vizita nee lori hela nesesidade ou apoiu oituan ba vitima sira.

“Ohin mai ho Gabinete Prezidensial Republika hamutuk ho parseiru sira hanesan PLAN International, Rede Feto, Fundasaun SADIA, lori netik apoiu oituan hodi hatutan netik nesesidade ba loron balun nia.” katak nia.

Nia mos husu ba vitima sira atu mantein kuidadu aan nafatin, tanba seidauk hatene los bainhira mak bele para.

Nunee mos Xefe Bairru Santa Cicilia, hanesan mos refuziadu Rozito Braga hatutan, sente haksolok ba vizitasaun husi espoza nia.

“Vizitasaun husi Primeira Dama nee ami sente kontente no orgullu, agradese mos ba hahan neebe mak apoiu husi espoza nia mai, maske kiik maibe ami konsidera nee hanesan buat valor boot ida mai ami komunidade” katak nia.

Nia hatutan sira nia aldeia laiha ema ida mate maibe iha komunidade ida mak kalen koa ain, maibe laiha ema mak mota lori.

Nesesidade baziku neebe mak apoiu mak hanesan foos, mina, Supermie, susu ben, sabaun haris, biscuit, rinso, pepsodent, masin, masin midar, ho seluk tan.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here