Governu Apoiu Konferensia Episkopal

ASINA AKORDU – Prezidente Episkolal Timor Leste, Bispo Dioseze Maliana, Dom. Norberto Amaral, ho VIII Governu Konstituisional neebe dirizi husi Primeiru Ministru Taur Matan Ruak asina akordu subvensaun annual ba Konferensia Episkopal Timor Leste. Seremonia asina akordu nee halao iha Palasio Governu Dili, Sesta (13/11/2020). (Foto: STL/Donaciano Magalhães)

DILI, STLNEWS.co — VIII Governu liu husi Orsamentu Jeral Estadu (OJE) 2020, fo apoiu ba konferensia Episkopal hamutuk US$ 5 milloens, no kompromete esforsu atu atinji US$ 15 milloens tuir konkordata neebe asina ho Santa Se.

Primeiru Ministru Taur Matan Ruak hatete, governu kada tinan sempre asina akordu ida bazeia ba konkordata governu despoin Orsamentu Jeral Estadu (OJE), ba iha konferensia Episkopal.

“Ba 2020 governu tau US$ 5 milloens ba Episkopal no ba oin mai governu kompromete sei halo esforsu hodi tau US$ 15 milloens tuir konkordata neebe iha,” hatete PM bainhira remata asina akordu ba apoiu Orsamentu nee iha Palasio de Governu, Sesta, (13/11/2020).

PM relata katak Governu apartir Orsamentu Jeral Estadu tinan 2021 sei halo esforsu boot hodi sistematiza hodi observa transparensia atu nunee governu bele dezenvolve Orsamentu ba 2021 haree ba baze do Orsamentu por programas.

Nia hatutan baze Orsamentu programa iha ona sistema rua atualmente funsiona, hanesan sistema dalan ba futuru neebe mak sei jere husi Gabinete Primeiru Ministru nian, no mos sistema de elektroniku neebe Mak sei jere husi Ministeriu Finansas. Ba sistema de elektroniku nee rasik sei haree liu ba iha programas, sub-programas, atividades, kuantifikasaun no mos haree ba iha metas no objetivus.

PM akresenta katak primeira ves modelu Orsamentu 2021 neebe haruka ba iha Parlamentu Nasional, tuir sistema ho totalmente, no la hanesan ho 2017, 2018 halo ho modelu projeitu pilotu. Modelu Orsamentu nee sei la para deit iha nee, no ba pasu seguente nee sei avansa ba modelu de Orsamentu baziku dezenpenu no tuir fali mak modelu orsamentu da baze dos rezultadus. Nee hanesan esforsu neebe mak governu halo ona, no mos kria kondisoens hodi pasa ba governu elektroniku.

Primeiru Ministru informa hahu tinan oin governu sei investe iha fibra otika no iha planu ba iha 2022 atu buat hotu lao ho diak, liliu iha area Dili nian, hodi bele garante servisus Sistema governasaun Elektoniku nian. “Se velosidade internet lao diak, ho nunee sistema Governasaun Eletronik nee bele avansa diak liu,” tenik PM.

Nia afirma sistema eletronika nee funsiona diak bele atinje objetivu liu liu rezumu hanesan tranparensia no mos sistematizasaun, tanba maoir disiplina ba gastus hirak nee foku liu ba rezultadu neebe mak Sosiedade sira hakarak. Tanba nee Mak Governu iha privilezu ida hakarak servisu nafatin ho konferensia Episkopal, no iha disposisaun tomak saida deit mak Governu bele ajuda no kontribui, para bele hadia transparensia no responsabilizasaun, tanba nee Governu prontu atu ajuda konferensia episkopal iha Jestaun rekursus no mos finanseiru.

Iha fatin hanesan Bispu Deoseje Maliana, Dom Norberto Amaral hatoo agradese ba VIII Governu konstituisional, Tanba iha situasaun apertadu tanba iha hela faze politika ida neebe la estavel, maibe sei bele iha fuan atu aloka osan ba iha igreza hamutuk US$ 5 milloens.

“Hanesan babain ita asina nee tuir definisaun husi Governu fo apoiu ba Edukasaun, Sosial, ba Administrasaun Sosial no seluk-seluk nee iha ona, no depois iha laran nee ami mos iha regras uza osan sira nee tuir depois mak sei responsabiliza ho relatoriu ida para bele hatoo ba Governu,” tenik Dom Norberto.

Nia hatutan katak, asina ofisial ho parte governu nian, hamutuk ho tinan ida nee ba dala tolu ona, Primeira vez hahu ho VII Governu ho US$ 15 milloens, maibe realidade momentu neeba igreza simu deit US$ 6 milloens, tanba US$ 9 Milloens Governu Finansia hikas ba obras sira neebe maka seidauk hotu.

Iha segundu asina-tura Governu apoio US$ 10 Milloens, no osan hirak nee uza ona, no relatoriu mos entrega hotu ona ou hatama ona ba iha Governu. Ida nee mos hamutuk US$ 5 Milloens nee la tama ba iha projeitu sira, maibe sei halo deit ba iha atividade sira seluk nian.

Seidauk Komprende Regras
Amu Bispu Deoseze Maliana dehan parte iosezanus sira nia preokupasaun, iha momentu sira hasoru malu ho Primeiru Ministru, no buat hirak nee tanba seidauk komprende regras husi akordu neebe asina entre governu ho Santa Se rasik. Bainhira rona katak disezanus sira preokupa tanba rekursu insufisiente husu atu Orsamentu neebe mak dispoin ba iha Episkopal nian bele aparte mos pakote ida. “Hau dehan por enkuantu labele, Tanba nee problema Ida internu neebe Mak konferensia Episkopal sei hare, naturalmente disposisaun rekursu nee mos tuir deit kapasidade neebe Mak Ita iha,” komenta Dom Norberto.

Konferensia Episkopal iha nesesidades barak tebes maibe rekursu Mak limitadu, tanba nee mak esforsu sira nee halo deit forma progresivu de akordu ho kapasidade neebe Mak iha. “Ita nia ambisaun hakarak halo buat sira nee dala ida deit, Maibe rekursu neebe mak ita iha impoin ba iha planeamentu neebe mak diak no progresividade nee importante,” esplika nia.

Reportajen: Alberto Menezes
Editor: Godinho Barros

LEAVE A REPLY

Please enter your comment!
Please enter your name here