Governu Aprova Tetu OJE 2021 Billaun $1,895

Governu liu husi reuniaun Konsellu Ministru, aprova ona projetu deliberasaun neebe aprezenta husi Vise Ministra Finansas (MF) Sara Lobo Brites, kona ba preliminar ba tetu agregadu no dezagregadu ba Orsamentu Jeral Estadu (OJE) 2021 ho montante billaun $1,895. (Foto: MPKM)

DILI, STLNEWS.co – Governu liu husi reuniaun Konsellu Ministru, aprova ona projetu deliberasaun neebe aprezenta husi Vise Ministra Finansas (MF) Sara Lobo Brites, kona ba preliminar ba tetu agregadu no dezagregadu ba Orsamentu Jeral Estadu (OJE) 2021 ho montante billaun $1,895.

Tuir Ministru Prezidensia Konsellu Ministrus (MPKM) Fidelis Leite Magalhães hateten, Vise Ministra Finansas Sara Lobo Brites, aprezenta kona ba proposta tetu Orsamentu Jeral Estadu 2021, no rona mos proposta husi Sub-Komite no Komite Revizasaun Orsamentu Poltiku (KROP), maka governu define tetu orsamentu ba tinan 2021 nian ho montante billiaun $1,895.

“Maka Konsellu Ministru aprova ona tetu Orsamentu Jeral Estadu ba tinan 2021 hamutuk billiaun $ 1,895,” dehan Fidelis Leite Magalhaes, hafoin remata reuniaun Konsellu Ministru iha Palasiu Governu, Dili, Kuarta, (30/09/2020)

Fidelis dehan, maske governu aprova ona tetu orsamentu, maibe nee hanesan preliminar deit, tanba tekniku husi Komite Revizaun Orsamentu Politku (KROP) sei hare fila montante OJE 2021, nunee iha reuniaun Konsellu Ministru tuir mai, governu sei foti desizaun ida neebe definitiva kona ba tetu montante ba OJE 2021 nian.

Tanba nee nia dehan governu liu husi Ministru Finansas sei halo esforsu, nunee bele lori orsamentu ba iha Parlamentu Nasional tuir kalendariu neebe preve ona.

“Ministeriu Finansas sei halo esforsu hotu nunee bele aprezenta Orsamentu Jeral Estadu 2021 ba iha Parlamentu Nasional, tuir kalendariu neebe antes nee preve ona hanesan loron 15 fulan Outobru” dehan nia.

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here