Governu Australia Apoiu Finanseiru Ba Programa TOMAK Millaun AU$25

Prezidente Republika (PR) Francisco Guterres Lú Olo ho Enkaregadu Xefe ba Embaixada Australia, Philippa Venning. (Foto: Embaixada Australia)

DILI, STLNEWS.co – Governu Australia apoiu finanseiru ba programa TOMAK (Toos Ba Moris Diak), ho montante millaun AU$25 no kuaze millaun US$17.7 husi tinan 2016-2021.

Kestaun nee hatoo husi Enkaregadu Xefe ba Embaixada Australia, Philippa Venning, ba STL via telefone, Sesta (02/10/2020).

“Governu Australia fo finansia programa Toos Ba Moris Diak (TOMAK) ho montante millaun AU$25 (kuaze millaun US$17.7) husi tinan 2016-2021 hodi apoia ba seguransa ai-han, nutrisaun no dezenvolvimentu komersiu agrikultural iha Baucau, Bobonaro no Viqueque.” dehan Enkaregadu Xefe ba Embaixada Australia.

Enkaregadu Xefe ba Embaixada Australia dehan igualdade jeneru sai hanesan prioridade ba Australia, nunee mos ba programa TOMAK neebe kompremetidu ba haforsa igualdade jeneru no empodera feto sira nia ekonomia iha TOMAK nia serbisu.

Foto: Embaixada Australia

Philippa Venning hatutan programa TOMAK apoia toos ba uma-kain, inklui feto no mane sira, hodi hadiak sira nia pratika halo toos nunee hetan osan liutan husi sira nia produtu. Parseria ho Ministeriu Agrikultura no Peskas (MAP), programa TOMAK serbisu ho agrikultór sira hodi hadiak produsaun sira hanesan foremungu, fos mean, forerai no liis boot. Feto sira kaer papel importante ba produsaun produtu hirak nee.

“Programa nee mos involve feto sira ba formasaun iha kampo atu nunee sira aprende hadiak liutan pratika ba toos nian no halo mos teste ba fini no ekipamentu foun. Programa TOMAK, hamutuk ho IADE, halao mos serbisu ho feto no mane sira iha area rural hodi hadiak sira nia komprensaun kona-ba konseitu negosiu relasiona ho rendimentu no gastus, hodi nunee sira bele halao sira nia toos nuudar negosiu ida no hahu halo tranzisaun husi halo toos subsistensia ba agrikultura komersial” hatete nia.

Nia hatutan toos nain feto sira iha Uailili, Baucau kuda fini ba liis no aprende oinsa atu uza sistema irigasaun bee-turuk.

Programa TOMAK mos hakarak hadiak nutrisaun iha uma-kain sira area rurais nian, liliu ba feto no labarik kiik sira.

“Programa TOMAK parseria ho MAP, Ministeriu Saude (MS) no Organizasaun Naun-Governmental (ONG) hodi promove pratika agrikultura neebe sensitivu ba nutrisaun atu nunee toos nain sira kuda ai-han no haliak animal hirak neebe mak sira bele han no mos faan hodi hetan osan atu bele hetan nutrisaun tuir familia tomak nia nesesidade.” tenik nia.

Foto: Embaixada Australia

Nia akrezenta liu tan programa TOMAK mos serbisu hamutuk ho grupu nutrisaun komunitaria neebe mak promeve pratika hadiak nutrisaun ho inan-aman no avo feto sira. Rezultadu peskiza programa TOMAK hatudu katak avo feto no inan-banin sira mak sai hanesan influensiador ba pratika nutrisaun iha uma-kain sira.

Programa TOMAK parseria ona ho UN Women, Sekretaria Estadu ba Igualdade e Inkluzaun, Autoridade Munisipiu Baucau no Bobonaro halao peskiza konaba esperiensia husi feto maluk sira, neebe mak faan sasan iha merkadu.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here