DILI, STLNEWS.co – Governu da-8 konstituisional inkonsistensia ba desizaun sira ho pratika iha terenu, tanba husi implementasaun Estadu Emerjensia (EE), Serka Sanitaria (SS) ho Konfinamentu Domisiliariu (KD), maibe ema nafatin halo movimentu ba mai liu – liu iha area fronteira.
Tuir observador politika UNTL, Felisberto de Carvalho hatete, governu implementa hikas fali KD iha Munisipiu Dili, tanba numeru transmisaun Covid-19 aumenta, maibe iha fulan liu ba governu autoriza hikas igreja halo misa, reativa eskola iha nivel primaria to’o iha universidade, no atividade sira nee foin hahu semana rua governu aplika hikas KO.
“Ita bele dehan, governu inkonsistensia entre desizaun sira ho pratika iha terenu, tanba implementa EE, SS no KD, maibe fo liberdade ba ema hodi tama sai fronteira,” dehan nia ba STL liu husi WhatsApp, Sabadu nee (28/08/2021).
Nia dehan, depois husi implementa EE, SS, no KO, maibe laiha politika subsidiu ruma hodi ajuda povu, halo povu hamlaha, lakon serbisu, laiha rendimentu, kapasidade kompra tun no implika ba numeru kiak umenta.
Aleinde nee, halo estudante tantu nivel ensinu basika, sekundariu no universitariu, lakon direitu ba edukasaun durante semestre ida nia laran.
Nunee mos halo transporte publiku sira la halo movimentu no labele hetan rendimentu atu sustenta sira nia familia, depois impede movimentu ema nian.*
Reportajen: Domingas Soares
Editor: Ekipa STL
