Governu Sei Aprova Medida Foun Apoiu Ba Sidadaun Sira

Ministru Koordenador ba Assuntus Ekonomikus (MCAE) Joaquim Amaral. (Foto: Espesial)

DILI, STLNEWS.co – Ministru Koordenador ba Assuntus Ekonomikus (MCAE) Joaquim Amaral, informa tempu besik governu sei aprova medida foun hodi hatan ba nesesidade komunidade iha situasaun estadu emerjensia.

“Ohin enkontru ho Primeiru Ministru atu atualiza servisu no simu mos orientasaun servisu konaba oinsa atu finaliza medida sosioekonomika neebe governu hanoin sei introdus iha tempu badak, hodi hatan situasaun neebe dadaun nee ita hasoru,” dehan MCAE Joaquim Amaral, hafoin remata enkontru ho Primeiru Ministru Taur Matan Ruak iha Palasiu Governu, Sesta (19/03/2021).

Governante nee dehan, medida foun neebe governu sei implementa mak atu salva povu no ekonomia, tanba nee hein katak iha semana oin governu liu husi reuniaun Konsellu Ministru bele halo apresiasaun hodi implementa.

Nia dehan, dadaun nee governu liu husi Ministeriu Finansas halo hela mobilizasaun husi orsamentu neebe mak governu iha, nunee wainhira aprova ona bele finansia ba medida sosioekonomika nee iha tempu badak.

“Konaba total orsamentu hau seidauk bele dehan, tanba nee husu atu hein oituan wainhira iha aprovasaun bele hare nia montante, para utiliza hodi responde ba situasaun neebe agora ita hasoru,” dehan nia

Tanba nee governu husu ba parte hotu-hotu nia apoiu, nunee bele hadia ekonomia no saude ba populasaun.

Reportajen: Ekipa STL

LEAVE A REPLY

Please enter your comment!
Please enter your name here