Governu Tenke Apoiu Subsidiu Ba Povu

Jurista Avelino Coelho. (Foto: Espesial)

DILI, STLNEWS.co – Bainhira governu implementa regra serka sanitaria, tenke apoiu subsidiu alimentasaun ka nesesidade bazika ba povu, atu nunee sira bele hakmatek iha uma.

Kestaun nee hatoo husi Jurista, Avelino Coelho ba STL, liu husi telefone, Kinta (18/03/2021).

“Implementasaun serka sanitaria tenki lao hamutuk ho politikas de subsidiu alimentares ka aihan no subsidiu ba enerjia, ba internet, ba bee hemu no nesesidades bazikas seluk tan, atu nunee povu bele hakmatek iha uma,” dehan Avelino.

Jurista Timor Oan nee mos husu ba Governu presiza haree ona infraestruturas hanesan saude, hodi nunee fo kondisaun diak liu ba povu nee bele moris. Governu Implementa ou estabelese serka sanitaria, nee opsaun neebe los atu kontrola propagasaun moras pandemia Covid-19. Maibe dalan uniku ke Governu foti, perante situasaun propagasaun no kontaminasaun.

Nia hatutan loloos governu tenke kria rekezitus ba ema estranjeiru atu tama mai Timor Leste, fo prioridade ba ema mai investe ka loke kampu servisu no sira neebe seidauk iha oportunidade atu tama para lai.

“Konaba ema husi rai seluk tama mai Timor-Leste, lolos Governu haree prioridades ka klasifika entradas. Sera ke ema estranjeiru nee investe iha Timor-Leste, ka kria kampu trabalhu iha Timor-Leste, ka nia profesional neebe servisus iha agensias internacionais. Karik la prense rekezitus hirak nee, hau hanoin ladauk oportunu,” katak nia.

Iha parte ketak, Officer Asia Justice and Right (AJAR), Inocencio Xavier hatutan, bainhira governu hasai rejulusaun do governu tenke iha mos planu, nunee bele fo subsisidu ba komunidade sira, nunee bele hakmatek iha uma hodi taka total atividade.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here