Governu Tenke Kontrola Rede Internet

Akademista UNTL, Felisberto de Carvalho. (Foto: STL/Natalina Lopes)

DILI, STLNEWS.co – Governu tenke kontrola fornesedor redi internet, hodi labele prejudika prosesu aprendizajen online.

Akademista Universidade Nasional Timor Lorosae (UNTL), Felisberto de Carvalho hatete, serka sanitaria iha munisipiu Dili, hapara atividade atendementu publiku, atividade aprendizajen, no atividade sira seluk tanba labele ba fatin servisu, entaun atividade hotu halo iha uma.

“Tanba nee governu tenke kontrola fornesedor redi internet hodi labele prejudika prosesu aprendizajen online no servisu atendementu ba publiku nian,” dehan Felisberto ba STL, liu husi telefone (29/03/2021).

Nia fo ezemplu iha universidade estabelese koalia virtual ou online. Professor ho estudante sira hasoru defikuldade sobre rede internet. Sala ruma labele halo tanba rede neebe lao ho neneik. Ho situasaun sira hanesan nee governu tenke fasilita estudante, professores sira, funsionariu publiku sira, hodi halo atividade virtual.Tanba durante nee governu nunka fo sansaun ba fornesedor rede internet.

Iha sikun seluk antes, estudante UNTL Luiza Noviana Suni hatete, “durante ami aula online buat barak mak ami hasoru. Aula/sistema online diak, maibe iha parte balu ladiak. Tanba bainhira aula online ita presiza enxe pulsa. Ho sistema ida nee dala ruma ita kompriende no dala ruma ita lakompriende materia saida mak dosente fo/hanorin.”

Hatan ba preokupasaun nee Ministru Ensinu Superior Siensia no Kultura (MESSK), Longuinhos dos Santos hatete, ”hau hatete katak ita sei tau atensaun maibe depende mos ba orsamentu neebe ita preve, portantu Ministeriu Ensinu Superior. Hau hatete ona ba ita boot sira katak, orsamentu ita seidauk preve ba ajuda pulsa ba estudante sira, maibe ita tetu no tau konsiderasaun ba asuntu ida.”

Reportajen: Blandina Mauno
Ediotor: Ekipa STL

LEAVE A REPLY

Please enter your comment!
Please enter your name here