DILI, STLNEWS.co – Negosiante Felisberto da Costa husu ba governu tenki buka estratejia diak ba vendedor sira neebe faan iha dalan ibun.
“Ita husu ba governu tenki haree estratejia neebe diak ida hodi organiza sidade Dili, nunee mos garante vendedor sira hotu iha espasu halo negosiu bele hetan rendimentu diak sustenta familia,” hatete Negosiante dalan ibun, Felisberto da Costa ba STL iha Komoro, Dili, Domingu (03/09/2023).
Nia dehan, bainhira sira la organiza diak negosiante sira, maibe Jestaun Merkadu sempre duni sira ba mai ida nee sei la rezolve problema.
“Jestaun sempre duni ami ba mai, no hadau ami nia sasan, ita hanoin ida nee sei la rezolve, tanba governu lakria kondisaun ba ami nee kapital Dili kontinia nakonu ho negosiante, tanba ami mos persiza osan hodi sustenta ami nia uma laran,” nia esplika.
Iha fatin ketak, Presidente Asosiasaun Emprezariál Muller Timor-Leste (AEMTL), Hergui Luina Fernandes Alves informa, konsiente espasu publiku laos fatin ba halo negosiu, nunee mos halo uma. Maibe situasaun obriga sira tenke buka meiu atu hetan rendimentu hodi sustenta famÃlia.
“Ida nee sai observasaun ida neebe ita hotu tenki tau matan, laos atu halo prosesu disiplinar deit ba vendedor sira atu labele faan sasan iha dalan ninin,” nia deklara.
Nia hatutan, Maibe halo nusa ita atu haree estratejia ida para halo disiplina sasan hotu tenke faan iha merkadu no obriga kliente sira tenki too iha merkadu atu hola sasan iha merkadu.
Nunee Sekretariu Estadu Asuntu Toponomia no Organizasaun Urbana, Germano Santa Brites Dias esplika, governu fo tempu ba vendedor sira iha Fatuhada semana ida atu husik espasu publiku fila hotu ba merkadu, tanba vendedor sira nee mai husi merkadu Manleuana no Bairo Pite.
“Iha mementu neeba ami hateten ona ba sira iha Fatuhada, fo tempu sira semana ida atu sira bele tama hotu ba iha merkadu Manleuana. Se mak sente aan mai husi Manleuana no Bairo Pite, ida-ida fila ba fatin,” nia deklara.
Tanba estrada publiku Foho Osanmean, Bidau Akaderu-Hun, Kampung Baru, Elemloi no Tasitolu, governu sei organiza diak atu sira komprende utiliza espasu pibliku.
Nia afirma, governu haree hela orsamentu atu hadia merkadu Taibesi no halo espansaun ba merkadu Manleuana atu vendedkr sira ba hotu iha merkadu laran.
Nia mos husu ba vendedor sira atu labele hela no toba metin iha merkadu laran, tanba merkadu fatin atu faan sasan iha loron kalan fila ba uma, laos hela fatin ba familia tomak.
(jen)
