DILI, STLNEWS.co – Setor privadu husu governu labele toba dukur, Xina mai loke kios iha Timor Leste (TL), presiza lei regula. Xina loke kios taka dalan ba Timor oan.
“Ita presiza lei ida hodi regula ema estranjeiru mai loke kios iha rai laran, tanba ita nia merkadu loke liu ba ema rai liur, tan nee sira uza oportunidade domina negosiu iha TL, hahu husi loke kios too iha loja boot, sira bele loke loja maibe laos kios, tanba loke kios taka dalan ba Timor oan sira,” preokuoasaun nee hatoo husi emprezariu antigu, Oscar Lima ba STL iha nia knaar fatin Komoro, Kinta nee (23/03/2023).
Nia esplika, atividade komersiu neebe lao iha rai laran, hahu husi kiik too boot domina husi ema estranjeiru, mak neineik sei lori problema boot ba povu TL, tanba ema rai liur sei domina ekonomia TL, tristi tanba too agora laiha membru governu ida atu preokupa konaba asuntu nee, no aat liu tan mak SERVE loke tan fali espasu ida ema mai ho US$ 10 ka US$ 20 bele halo negosiu iha rai laran, ho problema sira nee hotu atu lori TL nee ba neebe los.
“Hau fo bemvidu ba maluk sira husi estranjeiru atu mai investe iha TL, maibe ami bandu labele mai loke kios iha lidun-lidun sira nee, tan nee fo espasu ba Timor oan loke kios, labele ema liur,” dehan Oscar Lima.
Nia hakotu, Emprezariu Internasional sira mai atu investe, iha investimentu neebe boot, setor privadu rai laran la konkorda estranjeiru mai loke kios.
(mad/jac)
