DILI, STLNEWS.co – Grupu Arte Jenatu Maubara kontenti, tanba hetan konvite husi komisaun organizadora partisipa iha feira ba selebrasaun loron FALINTIN, neebe monu iha loron 20 fulan Agostu no loron konsulta popular 30 fulan Agostu, tanba nee komisaun organizador hamutuk ho Ministeriu Turismu Komersiu no Industria (MTCI) realiza feira hodi komemora eventu importante nee.
“Ami kontenti, tanba komisaun organizadora ba feria nee konvida ami lori produtu arte jenatu husi Maubara mai faan iha nee durante fulan ida. Tan nee hanesan grupu produtor, grupu feto rural ami kontenti tebes, tanba ami nia produtu sira nee labele faan iha fatin deit, maibe tenki lori mai partisipa iha feira sira hanesan nee,” kestaun nee fo sai husi Koordenador Grupu Arte Jenatu Maubara, Maria da Costa Cabral ba STL iha Tasi Tolu, Tersa nee (02/08/2022).
Nia dehan, hanesan grupu produtor ba produtu arte jenatu, prontu atu partisipa iha feira saida deit.
Iha fatin hanesan, Julia Amaral hanesan membru Grupu Arte Jenatu hatutan, esperansa grupu ida nee nian iha feira nee mak atu hetan rendimentu hodi sestenta ekonomia familia.
“Feira nee sei lao durante fulan ida nia laran, tanba nee ami mai lori kedas ho ami nia produtu homan, atu nunee bainhira ami nia stok hotu karik ami nafatin produs hodi atende ba nesesidade merkadu, aleinde nee bele iha mos rendimentu ba ami nia familia,” dehan membru nee.
(mad)
