Halo Atividades Komersial, Tenke Hetan Lisensa Husi SERVE

Diretor Ezekutivu SERVE, Florencio Sanches. (Foto: STL/Jacinta Sequeira)

DILI, STLNEWS.co – Bainhira atu halo atividades komersial iha ro Berlin Nakroma no ro Success, tenke mai rejistu iha SERVE, para iha lisensa hetan sertifikadu.

Tuir Diretor Ezekutivu SERVE, Florencio Sanches hatete, durante nee sempre fo sai bebeik ona iha media katak, maluk sira neebe hakarak atu halo negosiu ruma, primeiru sira tenke hakat mai rejistu uluk lai iha SERVE, atu nunee sira bele hetan lisensa,agora la mai rejistu, sira kontinua halo nafatin sira nian atividades.

“Sira neebe mak halo atividades komersial, ezerse atividades ekonomiku iha ro laran seidauk rejista, tuir lolos ami tenke hamutuk ona, maibe ho serka sanitaria, entidades sira seidauk tuur hamutuk, maibe koalia tiha ona, hodi tuur hamutuk para atu nunee halo inspeksaun dala ida, neebe dala ida tan liu husi media ida nee, apela ba sira neebe halo atividades negosiu, laos deit iha ro Berlin Nakroma nian laran deit, maibe ro Success mos hanesan deit, se karik sira hakarak halo atividades komersial iha ro laran lei permite, maibe lei la permite halo atividades maibe seidauk rejistu iha SERVE, ou seidauk hetan lisensa no hetan sertifikadu,” dehan Florencio ba STL liu husi telefone Kuarta (07/04/2021).

Nia dehan, apoiu liu husi media STL ida nee bele fo hanoin ba ema hirak neebe halo atividades komersial iha ro laran, tanba autoridade sira hatene ona katak, maske ema sira nee halo negosiu, maibe seidauk rejista, selae bele kona rihun US$ 5 ba sira nian atividades neebe sira halo iha ro laran.

“5 mil dolar nee ba SERVE nian deit, agora ita seidauk sura ba sira tributaria, tanba rihun lima nee, husi SERVE deit mak aplika, tuir lei neebe mak fo kompetensia mai iha SERVE. Ita iha koordenasaun nafatin, nomos ita iha koordenasaun ba sira neebe taka kompania katak SERVE laos tuur-tuur hasai desizaun, maibe SERVE halo koordenasaun servisu ho autoridade hotu, ezemplu se kompania ida atu taka, maibe SERVE informa fali ba iha autoridade tributariu no Ministeriu Finansas, atu haree katak, iha baze de dadus sira nee, kompania nee iha dadus ou iha dividas ruma ka lae, se laiha dividas informa fali ba MF, para SERVE bele foti medidas, se iha ita pendente, ida nee mak ita halo komunikasaun,” nia dehan.

Direitor Ezekutivu nee akresenta, agora dadaun iha planu atu halo komunikasaun ho sira husi SEFOPE, depois ho imigrasaun, atu nunee kontrolu no desizaun neebe mak halo dala ida, tanba nee sira sempre iha lina koordenasaun neebe mak diak ba asuntu hirak nee, ida nee mak koordenasaun SERVE halo, para atu bele apoiu governu ida nee, hodi dezenvolve ninia ekonomia,liu-liu pandemia no afeita tan ba dezastre naturais ida nee.

Iha parte seluk, Prezidente APORTIL Flavio Cardoso Neves, hatete, ba asuntu ida nee sira sei koordena malu ho parte SERVE nian, atu nunee APORTIL ho SERVE tenke iha lina koordenasaun nafatin, para too tempu ida bele haree asuntu ida nee.*

Reportajen: Jacinta Sequeira
Editora: Domingas Gomes

LEAVE A REPLY

Please enter your comment!
Please enter your name here