Husu Vendedores Hamamuk Santa Cruz

Foto Ilustrasaun (GDD)

DILI, STLNEWS.co – Xefe Departamentu Jestaun Merkadu Munisipiu Dili (JMMD), Berta Santa Viera husu vendedores hamamuk fatin iha Semiteriu Santa Cruz nia oin. Fatin nee laos fatin faan sasan.

Ema barak faan iha neeba. Sira okupa teb-tebes fatin neeba. JMM Dili halo hela patruilamentu jeral ba fatin neeba, hatete Berta Santa Viera iha ninia knar fatin, Tersa (20/10/2020).

Parte JMM Dili koalia ona ho ofisial sira. Iha tempu badak, sira sei halo aviju jeral, liliu ba negosiantes sira mak faan iha Santa Cruz tanba fatin nee, laos fatin faan. Sira hotu tenki hamamuk, para vizitantes sira livre ba vijita rate. Kareta no motor bele para ba. Maibe na realidade kareta para fatin ladiak, maibe negosiantes sira maka nakonu ho sumbrinha (payung), boot tau iha neeba hodi sira faan.

“Ami informa ona ba autoridade lokal sira atu halo uluk avizu, depois maka orden publik sira tun halo aviju fila fali, karik negosiante sira maka sei lafiar no larona orden sira nee, entaun ami sei tun prende ou foti sira nia sasan sira hotu,” dehan nia.

Iha tempu badak mos, JMM Dili sei fo sansaun ba negosiantes sira iha semiteriu Santa Cruz. “Ami mos lanonok no preokupa teb-tebes atu haree situasaun hirak nee, iha tempu badak nia laran ami sei halo aviju jeral ba iha negosiantes sira neebe maka faan iha santa cruz nee, ami sei halo aviju maka sira lakohi halo tuir maka ami sei foti sasan sira nee hotu iha tempu badak nia laran,” hatete nia.

Tanba negosiantes fofoun nee iha deit vendedores ambulante ida maka faan iha neeba, ami ba hase laiha tiha, maibe ikus nee nakonu ho sumbrinha (payung) sira.

Iha fatin ketak Deputada Bankada PLP Maria Angelina Sarmento hatete, governu presija halo intervensaun lalais hanesan iha simeteriu santa cruz fatin ida neebe historiku movimentu manifestasaun 12 Novembru akontese iha neeba.

Maibe loro-loron ita haree familia ou grupu ida ka rua iha ema nain hitu ka nain walu ba halo negosiu faan hahan tasak iha simeteriu nia oin, nee ita haree ladiak ba ita nia estetika nasaun nee, ita haree ladiak.

Maibe fatin ida nee fatin historiku bai-bain sempre vizita ruma mai ema sempre ba iha fatin simeteriu santa cruz nee, tanba haree ba historia akontesementu 12 novembru nian.

Aleinde nee mos iha uma rua neebe harii tan tiha ona iha simeteriu tama ba makan pahlawan nian sorin pozisaun ho santa cruz, neebe governu presija halo intervensaun lalais, selae ema seluk mos ba halo tan uma iha fatin neeba.

Reportajen: Natalina Lopes/Blandina Mauno
Editor: Ekipa STL

LEAVE A REPLY

Please enter your comment!
Please enter your name here