Impase Politika & Covid-19 Halo Dezenvolvimentu Lalao

Ho situasaun impase politika inklui surtu Covid-19 lori Timor Leste ba too situasaun Estadu Emerjensia, hodi halo dezenvolvimentu iha rai laran lalao ho diak. (Foto: STL/Carme Ximenes)

DILI, STLNEWS.co – Ho situasaun impase politika inklui surtu Covid-19 lori Timor Leste ba too situasaun Estadu Emerjensia, hodi halo dezenvolvimentu iha rai laran lalao ho diak.

Tuir Eis Vise Ministru Edukasaun iha Governu da-7, Jose Neves Samala Rua katak, Timor Leste iha tinan rua ka tolu liu ba hasoru situasaun boot lubuk ida neebe trava uituan prosesu dezenvolvimentu iha rai laran.

Nia dehan, impase politika situasaun ida neebe ema barak hatene, maibe ema nia preokupasaun laos haree deit nee impase, mais solusaun saida mak ukun nain sira neebe kaer funsaun iha sira atu buka solusaun ba rezolve.

“Impase politika ho surtu Covid-19 mosu kuaze tutuir malu no ninia impaktu redus ita nia esforsu atu halo dezenvolvimentu iha seitor hotu hotu,” dehan Eis governante iha governu da-7 nee, ba STL iha ninia servisu fatin, Farol, Dili, foin lalais nee.

Jose Neves hatutan, impase politika nee tenke rezolve uluk, atu nunee bele fo kbiit ba ema hotu hodi hasoru Covid-19. Esforsu lubuk ida mak durante nee governu halo hodi kombate surtu Covid-19 iha Timor Leste.

“Ita iha susesu diak mak too agora Timor Leste laiha ema ruma neebe mate ou moras todan iha ospital kona ba moras ida nee,” Jose afirma.

Maski nunee nia dehan, too oras nee laiha ema matenek ida mak hatene surtu Covid-19 nee nia rohan no orijin iha neebe, maibe iha rai seluk desde ke moras nee sei iha Timor Leste mos seidauk bele senti seguru katak, livre ona husi surtu nee.

“Iha Indonezia neebe mak ninia efeitu nee komesa namkari makas liu tan ba propinzia neebe besik ita, tanba nee ita tenke kuidadu an nafatin, mesmu ke tooagora ita seidauk hetan vitima neebe mate tanba moras ida nee,” nia salienta.*

Reportajen: Carme Ximenes
Editor: Ekipa STL

LEAVE A REPLY

Please enter your comment!
Please enter your name here