Inagura BNCTL RAEOA, MCAE Husu Komunidade Tau Konfiansa

Ministru Koordenador ba Asuntu Ekonomikus (MCAE), Joaquim Amaral husu povu atu tau konfiansa nafatin ba Banku Nasional Comersiu Timor Leste foun sukursal RAEOA neebe foin inagura, atu nunee BNCT bele halao ninia servisu ho diak. (Foto: STL/Jacinta Sequeira)

OECUSSE, STLNEWS.co – Ministru Koordenador ba Asuntu Ekonomikus (MCAE), Joaquim Amaral husu povu atu tau konfiansa nafatin ba Banku Nasional Comersiu Timor Leste foun sukursal RAEOA neebe foin inagura, atu nunee BNCT bele halao ninia servisu ho diak.

Dehan MCAE, Joaquim Amaral, ba Jornalista iha edifisiu BNCTL foun pantai Macassar, RAEOA, Sesta (20/11/2020).

“Hau hanoin BNCTL hatudu nian prezensa tinan ida nee 2020, BNCTL loke ninia sukursal 3, iha Ainaro, Gleno, agora iha nee, hau hanoin bainhira kliente sira kestiona, nee sira hadomi no hakarak hadia, tanba nee hanesan banku estadu, ami servisu hamutuk ho BNCTL, atu nunee bele suporta BNCTL halo ninia servisu atendementu diak no besik liu tan ba iha komunidade sira,” dehan Ministru Joaquim.

Nia dehan, governu sei kontinua tau matan, tanba nee uniku, banku komersial estadu TL, tanba nee, hakarak ka lakohi, kapitalizasaun nee, hanesan reprejenta apoiu estadu nian, ho ida nee husu nafatin ba iha komunidade sira tau nafatin konfiansa ba BNCTL, atu BNCTL hadia aan, hodi halo servisu bele servi Timor oan sira.

Iha fatin hanesan, Prezidente Autoridade RAEOA, Arsenio Bano hatete, seremonia inagura ba BNCTL foun nee, nee hanesan atu bele fo konfiansa makas liu tan ba populasaun Oecusse, atu bele uja banku ida nee, hodi halao atividades ekonomiku.

“Oinsa mak mak ami bele reforsa liu tan banku, para bele halao diak liu tan, hodi servi ita nian populasaun sira iha Oecusse, hau hanoin ho edifisiu foun ida nee, sei halo atendementu neebe mak diak, ba populasaun Oecusse, tanba fulan-fulan ferik katuas, defisiente, veteranus no funsionariu publiku sira, durante nee sira forma deit iha loron manas, iha edifisiu neebe tuan, hau hanoin agora sei diak liu tan. Hau hanoin ho edifisiu foun ida nee, sei ajuda ita nian emprezariu sira Oecusse ninia, ho nunee bele halo atividades ekonomia diak liu tan,” dehan nia.

Inagurasaun edifisiu BNCTL foun Sukursal RAEOA nee, inagura husi, Ministru Koordebador asuntus ekonomikus (MCAE), Joaquim Amaral, akompania husi Prezidente autoridade RAEOA, Arsenio Bano, no edifisiu foun BNCTL RAEOA nee, lokaliza iha pantai Macassar RAEOA, neebe hetan partisipasaun husi, Ministru Koordenador ba Asuntu Ekonomikus (MCAE), Joaquim Amaral, Pezidente Autoridade RAEOA, Arsenio Bano ho nian estrutura, komandante F-FDTL, PNTL, Telcomcel, Timor Telecom, Telemor, Autoridade RAEOA, funsionariu BNCTL rasik, Vise Governadora Banku Central TL, setor privadu, Banku Mandiri, BNU, no parseru seluk tan.*

Reportajen: Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here