Isu OJE Lamai, Labele Rona Tun Sae

Primeiru Ministru Taur Matan Ruak hatete, la bele rona tun sae isu neebe espalla iha publiku katak, Orsamentu Jeral Estadu tinan 2020 lamai Timor Leste, tanba orsamentu nee governu ezekuta hotu ona. (Foto: Media PR)

DILI, STLNEWS.co – Primeiru Ministru Taur Matan Ruak hatete, la bele rona tun sae isu neebe espalla iha publiku katak, Orsamentu Jeral Estadu tinan 2020 lamai Timor Leste, tanba orsamentu nee governu ezekuta hotu ona.

Xefe Governu hatoo kestaun nee ba jornalista bainhira remata hasoru malu ho Prezidente Republika, Francisco Guterres Lú Olo, iha Palasiu Prezidente, Nicolau Lobato, Bairru Pite, Dili, Kinta (07/01/2021).

“Uluk dehan OJE 2020 mak lamai, agora 2020 hotu tiha ona, tanba nee mak sebele rona mak Premeiru Ministru labele ba rona fali A, B, C iha kotuk neeba katak osan laiha,” katak Xefe Governu.

Xefe Governu hatutan, diak liu rona informasaun husi Governu lalika rona lia iha kotuk kotuk, tanba oras nee Orsamentu aprova ona husi Parlamentu Nasional no promulga ona husi Prezidente Republika, tanba nee mak Ministru Finansas fo Ordem ba Banku Central osan sei mai.

“Kuandu osan lamai naturalmente ami sira nee hatene uluk mak informa ba imi agora imi ba rona iha neebe mai litik fali hau ida nain nee, ita ukun nee ain sae fali inves husi ulun mak tun agora husi ain mak sae nee labele, inves kareta mak dada kuda agora kuda mak dada fali,” PM TMR hatete.

Nunee mos kona ba foos neebe oras nee mamuk iha armajen Primeiru Ministru hatete, sira seidauk halo avaliasaun, mais Ministeriu Ekonomika sei atende kona ba problema nee.

“Ami seidauk halo avaliasaun ida tanba nee mak hau seidauk pronunsiamentu mais ami atentu hela liu liu Ministeriu Ekonomiku hodi atende hela ida nee.” katak PM.

Aleinde nee hatan kona ba remodelasaun Xefe Governu dehan, sira remodela bebeik tanba PM foin lalais mai remodela hela, mais kuandu nesesariu sira halo remodelasaun mais por enkuantu seidauk.

“Remodelasaun boot neebe mak halo mak reforsu husi ekipa husi senhor Vise ninia nee remodelasaun boot mak nee kuaze prense governasaun tomak, agora seluk nee seidauk kuandu iha ami sei informa, se mak fo desizaun nee avansa, hau hanesan Primeiru Ministru kuandu iha entaun iha, se laiha entau laiha,” katak nia.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here