João Saldanha: Setor Turizmu Hakdasak

Surtu Covid-19 fo impaktu ba ekonomia Timor Leste, nunee halo setor turizmu iha rai laran hakdasak ka grave, tanba tinan ida lahetan vizita husi turista sira. (Foto: STL/Madalena Horta)

DILI, STLNEWS.co – Surtu Covid-19 fo impaktu ba ekonomia Timor Leste, nunee halo setor turizmu iha rai laran hakdasak ka grave, tanba tinan ida lahetan vizita husi turista sira.

Kestaun nee fo sai husi ekonomista João Mariano Saldanha liu husi programa dada lia ho topiku “Dezafiu Estadu Iha Krize Ekonomia ho Covid-19”, neebe realize iha studio STL, Segunda (08/02/2021).

“Covid-19 fo impaktu ba atividade ekonomia iha TL, maibe grave liu setor turizmu, kuaze tinan ida ona la hetan vizita husi turista sira, hotel no restorante iha kapital Dili barak taka atividade, loja neebe faan material konstrusaun, balun lao, maibe balun taka, loja neebe faan nesesidade baziku sei iha konfuzaun ho folin,” dehan nia.

Nia afirma, kazu pandemia fo impaktu ba ekonomia global, nasaun barak hasoru problema hanesan, maibe TL nia problema maka depende makas ba importasaun, tan nee ba oin tenke halo mudansa hasae produsaun.

“Durante Covid-19 kompania balun taka sira nia atividade no balun nafatin lao, maibe halo ajustamentu ba folin nomos tenaga kerja, bele redus maibe atividade lao nafatin, maibe numeru sira nee ita seidauk hatene klean, tan nee presiza peskiza neebe klean atu nunee ita bele hatene diak liu tan konaba lalaok ekonomia iha TL laos los nee oinsa no nia impaktu nee oinsa,” dehan ekonomista nee.

Maibe iha nivel konferensia ida katak, kontrasaun ekonomia 2020 nee bele too 10% maibe sei ita too deit 6% deit mos nee diak e buat boot ida, tan nee hare ba folin sasan mos sae, hotel sira nee balun taka no sira neebe loke bele halo ajustamentu ba folin husi 20 too 30%.

Material konstrusaun nia folin sae, tan nee iha tinan 2020 nia folin sae husi 20% too 30% nee sae, no konaba aihan ho nesesidade baziku no programa sesta bazika, iha konfuzaun uituan ba folin sasan, tan nee la hatene los sasan folin tun ka sae, tan nee presiza observa didiak hodi hatene lolos nesesidade baziku folin tun ka, ou sae.*

Reportajen: Madalena Horta
Editora: Carme Ximenes

LEAVE A REPLY

Please enter your comment!
Please enter your name here