Kabun Obriga Alarico Kontinua Faan Modo

Negosiante Alarico dos Santos. (Foto: STL/Emerenciana Pinto)

DILI, STLNEWS.co – Tanba nesesidade no kabun atu bele tahan ba iis moris, obriga siidadaun Alarico kontinua faan modo iha estrada ninin hodi hetan netik osan hodi sustenta familia.

Tuir negosiante Alarico dos Santos katak, iha ninia moris durante nee ho deit faan modo mak hetan osan hodi sustenta familia. Maibe ho situasaun serka sanitaria nee, governu bandu ema labele halibur malu maibe tanba nesesidade obriga, nia kontinua faan.

“Ami nia mos lakohi atu faan, maibe tanba kabun obriga mak ami sempre lao loron lao kalan,” hatete Alarico ba STL iha Merkadu Bairru Pite, Sesta (02/04/2021).

Nia hatutan, nia parte lamenta ho atuasaun husi seguransa nian, tanba membru seguransa sira dala ruma duni sira neebe mak faan ho karisa, maibe negosiante seluk sira la duni.

Iha fatin hanesan negosiante, Luis Sarmento dehan, durante sira faan kompradores menus, la hanesan tempu uluk, antes serka sanitaria neebe mak lao iha kapital Dili, halo sira nia rendimentu tun no ema atu ba hola sira ninia sasan mos ladun iha.

Negosiant Luis Sarmento. (Foto: STL/Emerenciana Pinto)

“Tempu baibain nee ami faan hanesan pelumenus rendimentu iha netik, maibe durante serka sanitaria ou konfinamentu obrigatoriu ami faan deit hanesan nee mos ninia rendimentu susar los ba ami tanba kuandu ema sosa laiha,” dehan Luis.

Nia hatutan modo neebe mak sira faan laos kuda rasik, maibe ba hola tutan mak mai faan tutan, maibe kuandu ema la hola modo sira nee soe deit.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here