KAK-MP Tenke Loke Investigasaun Ba Autor Ro Haksolok

Diretor Ezekutivu FONGTIL, Daniel Carmo dos Santos. (Foto: STL/Santina Castro)

DILI, STLNEWS.co – Sosiedade Sivil liu husi Forum ONG Timor Leste (FONGTIL) dezafia Komisaun Anti Korupsaun (KAK) no Ministeriu Publiku (MP) atu loke Investigasaun ho seriedade ba autor neebe involve iha prosesu fo tenderizasaun ba Ro Haksolok.

Kestaun nee Diretor Ezekutivu FONGTIL, Daniel Santos do Carmo hatoo liu husi konferensia imprensa, neebe halao iha salaun FONGTIL, Caicoli, Dili, Kuarta (09/12/2020).

Nia husu ba PN hanesan orgaun neebe reprezenta povu atu uja sira nia kompetensia hodi koa sai tiha orsamentu adisional neebe governu kontinua atu aloka tan orsamentu tokon $14 ba Ro Haksolok, hodi aloka fali ba setor produtivu sira hanesan, agrikultura, turizmu, edukasaun, saude, bee mos no saneamentu.

“Ami husu ba governu atu halo prosesu sivil hasoru kompania neebe halo konstrusaun Ro Haksolok atu selu indeminizasaun ba estadu Timor leste no FONGTIL dezafia KAK no Ministeriu Publiku, atu ho seriedade loke investigasaun ba autor sira neebe involve iha prosesu fo tenderizasaun ba Ro Haksolok,” dehan Daniel.

Daniel lamenta, tanba fo fali ba kompania ida neebe Banka Riota tiha ona no laiha responsabilidade no husu atu lori kompania nee ba responsabiliza ba aktus neebe halo, hodi halakon Timor nia osan iha tribunal.

“See wainhira ita koalia konaba Ro Haksolok nee dezde 2017, projetu tenderizasaun nee to agora Ro nee seidauk haruka mai, signifika katak iha buat ruma lalos, entaun ita lakoalia atu rezolve ona, i kazu ida nee entrega ba KAK ho ministeriu publiku atu loke investigasaun laos atu rezolve hodi aumenta tan osan,” Daniel esplika.

Maibe nia dehan, dalan maka tenke loke invetigasaun, tanba projetu ida koalia iha durasaun, see tinan barak ona Ro nee lamai, maibe hakarak atu aumenta tan orsamentu nee laiha razaun atu aumenta tan.

Tanba osan nee osan povu nian, no sira laiha razaun atu foti desizaun tuir sira nia hakarak no husu atu rona povu nia lian, tanba povu sei infrenta problema barak iha agrikultura, turizmu, edukasaun, saude, bee mos, no saneamentu.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here