Kompania 100 Resin Desidi Taka Negosiu

Diretor Ezekutivu SERVE, Florencio Sanches. (Foto: STL/Jacinta Sequeira)

DILI, STLNEWS.co – Kompania nasional ho internasional kuaze 100 resin, deside taka atividade negosiu iha rai laran, tanba sira lahetan lukru ou rendimentu.

Diretor Ezekutivu SERVE, Florencio Sanches dehan, too ohin loron tama iha fulan Dezembru 2020, total kompania neebe taka hamutuk 100 resin ona, maibe kompara ho tinan kotuk nee numeru kiik, tanba sira hatama pedidu mai SERVE.

Nia dehan, tuir lolos labele taka kompania maibe oinsa mak taka deit atividades temporariamente, sira neebe taka kompania 100 resin nee, sira iha razaun katak sira laiha ona atividades no lukru, atu bele apoiu sira nian negosiu ho ida nee sira desidi atu taka.

“Horiseik ami simu tan empreza 2 hakarak taka sira nian kompania, numeru taka kompania sei tun iha tinan oin, tanba iha ona situasaun neebe diak teb-tebes OJE iha ona, ida nee bele sai sasukat ida, ba setor privadu sira para labele taka kompania, maibe sira bele taka deit mak sira nian atividades,” dehan Florencio ba STL, iha nia knaar fatin SERVE, Hudi Laran, Dili, Kuarta (30/12/2020).

Florencio hatutan durante nee SERVE sempre fo hanoin nafatin ba nain ba kompania sira, oinsa taka deit atividades, bainhira situasaun lao normal, sira bele halao nafatin sira nian negosiu, kompania neebe taka, durante nee sira halo konstruksaun no seluk tan.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here