Kompania Fornesedor Ezije Governu

Kompania fornesedor aihan sesta bazika ba benifisiariu sira, ezije governu atu halo pagamentu ba sira. (Foto: STL/Jacinta Sequeira)

DILI, STLNEWS.co – Kompania fornesedor aihan sesta bazika ba benifisiariu sira, ezije governu atu halo pagamentu ba sira.

“Ami seidauk halo pagamentu, maibe ami ezije ba governu, oinsa mak bele halo pagamentu. Benifisiariu barak, ami mos kendala nee ba orsamentu. Tanba nee ami sujere ba nai ulun sira, liu-liu ministeriu implementador sira, karik bele aselera lalais ami nian pagamentu nee, para kontinuasaun ba oin nee lao kapas liu tan,” liafuan nee haktuir husi Diretor kompania Mamisa Unip, Lda. Quintiliano N. de Jesus ba STL iha fatin distribuisaun Sesta Bazika Delta, Segunda (01/02/2021).

Nia hatete, sira hanesan liman ain governu nian, neebe mak husi ministeriu relevante hakarak hatoo ba nai ulun sira. Se karik bele aselera lalais pagamentu nee, atu nunee sira mos bele bok aan. Tanba sira ho kapital neebe naton, agora komesa hasoru difikuldade barak ona, maibe sira esforsu nafatin ho fiar neebe mak governu fo ba sira.

Iha fatin seluk, Diretor Kompania Cipma Unip, Lda. Quintiliano Moniz Carvalho hatete, sira iha sasan balun neebe mak atu hatama sasan, maibe governu dehan, sira labele simu ona, tanba orsamentu laiha.

“Hau hanoin iha programa sesta bazika, pagamentu balun lao no balun seidauk lao. Nee fo impaktu ba emprezariu oan sira neebe mak seidauk hetan pagamentu nee, tanba sasan balun sira foti hela karik, atu selu mos balun iha banku karik. Nee hanesan problema boot ida ba ami, tanba iha sesta bazika nee pagamentu seidauk, ita bele dehan foin halo pagamentu 10% ou tun husi ida nee,” katak nia.

Nia akresenta, problema ida mak traballador neebe servisu, depois sasan balun sei foti hela, debe banku ou debe kolega ruma. Sekuandu pagamentu tarde, ida nee influensia ba sira atu bele sosa fali sasan, tanba osan laiha.

Too notisia nee tun, STL seidauk halo konfirmasaun asuntu ida nee ba ministeriu implementador sira.*

Reportajen: Jacinta Sequeira
Editora: Domingas Gomes

LEAVE A REPLY

Please enter your comment!
Please enter your name here