Kompania Lamanipula Presu Sesta Bazika

Kompania fornesedor programa sesta bazika, la halo manipulasaun presu ba sasan, maibe bazeia ba kontratu neebe halo ona ho Ministeriu implementador. (Foto: STL/Jacinta Sequeira)

DILI, STLNEWS.co – Kompania fornesedor programa sesta bazika, la halo manipulasaun presu ba sasan, maibe bazeia ba kontratu neebe halo ona ho Ministeriu implementador.

Quintiliano N. de Jesus, hanesan Direitor kompania Mamisa Unip LDA hatete, presu ba aihan sesta bazika nee bazeia ba kontratu neebe kompania halo ho ministeriu implementador sira, horseik mak benifisiariu sira husi aldeia ida nee simu aihan sesta bazika ida nee, tanba sira distribui kada aldeia.

“Ami simu orientasaun husi ministeriu implementador sira, neebe presu nee ami la fo liu husi kontratu neebe mak ami asina ona, entaun ami bazeia ba ida nee, tanba ninia presu nee ami la fo liu husi ida nee, tanba ami fo tuir standar neebe ami halo kontratu ho ita nian governu, ami la halo manipulasaun, se ami halo manipulasaun, nee sira husi CAC no AIFAESA mai haree presu sira nee, bainhira sira mai ami hatudu ba sira, depois iha laran nee ami taka ninia presu, neebe kontratu nee ami halo ho ministeriu implementador,” dehan Quintiliano ba STL, iha fatin distribui sesta bazika neebe fahe iha Delta, Dili, Segunda (01/02/2021).

Nia dehan, tanba sira iha kasir nain 2, entaun kada loron sira halo atendementu depende deit, tanba ho estadu emerjensia nian laran, depois distansia sosial, ho buat sira nee sira sempre koordena ho xefe aldeia, xefe suku, bainhira benifisiariu sira mai karik ho volume neebe mak naton deit.

Foto: STL/Jacinta Sequeria

“Loron ida xefe familia nee bele too 50, tanba ita haree ba iha distansia sosial ninia, ema labele mai barak liu, fase liman no tenke uza maskra, tanba PNTL sempre mai fo avizu, entaun ami mos fo hatene autoridade lokal sira, para mai nee labele barak, ami nian stok sasan sesta bazika sei sufisiente hela,” nia afirma.

Nunee mos, Xefe Aldeia Efaka, Suku Manleuana, Postu Administrativu Dom Aleixo, Munisipiu Dili, Francisco de Jesus Afonso, dehan, total uma kain 301, sira nee hahu hetan ona aihan sesta bazika 407.

“Ohin ami halo 96 uma kain, aban sei fo ba uma kain 60 i tal, ami konta uma kain mak 301, durante simu aihan sesta bazika nee, ita haree buat balun mak ladun kompletu, maibe ami nian komunidade sira nunka ezije katak, konaba sasan ida nee, maibe ninia presu nee mak dala ruma ema kada pesoal ida hetan $50, maibe dala ruma sasan neebe mak ema sira simu nee la too ema nian osan neebe $50, tanba sira mak foti deit, entaun ema kada pesoal ida osan $50 nee la too sasan neebe mak tau iha saku ida,” dehan Francisco.*

Reportajen: Jacinta Sequeira/Madalena Horta
Editor: Carme Ximenes

LEAVE A REPLY

Please enter your comment!
Please enter your name here