DILI, STLNEWS.co – Papel governu nian tenki kontrola folin nesesidade baziku iha merkadu, tanba agora daudaun folin nesesidade baziku sae, implika ba povu kiik sira ne’ebe laiha osan atu sosa.
Kestaun ne’e fo sai husi reprezentante povu iha uma fukun Parlamentu Nasional, Deputada Olinda Guterres ba STL iha Parlamentu Nasional, Tersa nee (18/04/2023).
“Sasan folin, liu-liu fos nia folin hahu sae iha merkadu rai laran, tanba nee husu ba governu atu ezerse sira nia funsaun halo kontrolu iha baze, ho nune’e labele difikulta povu kiik sira ne’ebe laiha kbiit,” dehan Deputada Bankda KHUNTO, Olinda Guterres.
Nia mos afirma liu tan katak, karik governu la halo kontrola mak kompanhia importador sira bele halimar presu tuir idak-idak nia hakarak, tanba taxa ne’ebe governu aplika nee ba deit item haat ka lima, laos ba sasan hotu, tanba ne’e husu governu tenki kontrola sasan folin sae ne’e mai kedas husi nasaun importador sira ka lae, karik lae, tamba sa mak iha Timor presu aas, tan nee kompanhia sira labele uza oportunidade, ema hotu okupadu iha tempu ida agora nee hodi halimar presu.
Deputada KHUNTO ne’e mos sujere ba governu atu bolu kompanhia importador sira nee atu fo sira nia razaun ruma konaba folin nesesidade baziku, sira sosa iha merkadu rai liur ne’e nia folin tun ka sae, se lae mak sei fo implikasaun ba povu kiik sira atu deve tun hodi sosa netik fos ba konsumu.
(mad)
