Kompania Mate Sei La Hamoris Fali

Diretor Ezekutivu SERVE, Florencio Sanches. (Foto: STL/Jacinta Sequeira)

DILI, STLNEWS.co – Kompania neebe mate sei lahamoris fila fali, tanba lei sosio komersial neebe aprova husi Parlamentu Nasional (PN) no dekretu lei husi Konsellu Ministru la fo dalan.

Tuir Diretor Ezekutivu SERVE, Florencio Sanches, hatete, lejislasaun ohin nee kompostu husi lei sosio komersial husi PN, no dekretu lei husi Konsellu Ministru, rua nee la fo dalan ba kompania neebe mate ona atu hamoris fila-fali, nee labele, maibe nain sira tenke tur hamutuk, para harii fali firma foun, tanba nee, todan tebes.

“Hau atu fo informasaun, liu-liu ita nian komunidade emprezarial, bele intende no komprende didiak se karik kompania mate, ita nian lei sosio komersial numeru 10/2017, no dekretu lei rejistu komersial numeru 16/2017, hatete nunee, kompania mate iha ninia lalaok rua deit, lalaok ida primeiru, sosio sira mak hamate, lalaok ida segundu mate tanba halo krime, nee tribunal mak desidi, agora sira nee mate ona, bele ka lae, atu halo moris fila-fali, tanba lei rua nee la permite katak, kompania neebe mate ona, hanesan ho ema, moris dala ida no mate mos dala ida, entaun kompania sira neebe desidi sosio sira katak, labele halo moris fila-fali, maibe sosio sira sei moris, bele tur hamutuk atu harii fali firma no entidade foun, maibe naran labele hanesan,” dehan Florencio ba STL, iha edifisiu SERVE Hudi Laran, Bairru-Pite, Dili, Tersa (16/02/2021).

Nia dehan, prosedementu mate nee tanba saida, primeiru sira tenke hatama sira nian pedidu ba iha governu, liu husi autoridade tributaria iha Ministeriu das Finansas, para sira haree fila-fali sekarik kompania iha dividas foun ba estadu ka lae, se iha dividas foun ba estadu, autoridade tributaria husu halo kompleta no selu lai dividas sira nee.

“Agora SERVE prosesa tuir lei sosio komersial no rejistu komersial, ho ida nee, SERVE sei hasai tan karta ofisial ida katak, kompania nee hamate ona, no ninia tim durante nee, hanesan mos nian fuan no ran, ita hamate hotu kedas, tanba nee, ho razaun principal ida nee, kompania neebe mate, labele moris fila-fali. Aproveita atu fo hatene katak, diak liu ba future labele hamate kompania, maibe hamate atividades,” katak nia.

Iha fatin hanesan, Emanuel A. R. Soares, hanesan Diretor kompania Neol Dagris Unip.Lda hatete, ohin mai iha edifisiu SERVE atu halo renovasaun dokumentus ba kompania, nomos rejistu ba kompania foun, no alterasaun estatutu.

“Ohin mai iha SERVE, para atu halo renovasaun dokumentus ba kompania ninia, maibe ita haree ba iha sistema, maske ita iha faze EE nian laran, maibe iha liur ema nakonu, iha laran ema forma nee uituan deit, agora ita haree iha liur laiha distansia sosial ba EE ida nee,” nia dehan.*

Reportajen: Jacinta Sequeira/Madalena Horta
Editor: Ekipa STL

LEAVE A REPLY

Please enter your comment!
Please enter your name here