Komunidade Hadia Rasik Uma

DILI, STLNEWS.co – Uma neebe hetan estragus husi inundasaun, familia sira deside la hela hodi ba hela iha fatin seluk. Maibe agora dadaun sira komesa hadia ona, no fila fali mai hela iha uma neebe antes nee hetan estragus husi inundasaun.

“Agora ami mai hadia atu mai hela fila fali, iha laran tahu maka nakonu tanba nee suru sai tiha tahu nee maran ona, fakar fali rai henek, foin nahe karpet hodi hela ba,” dehan uma nain Simiao Soares ba STL, Sabadu (22/05/2021) iha Comoro.

Nia hatutan, uma neebe sira hadia la hadia hotu kedan, maibe hadia deit kuartu ida hodi hela uluk, depois maka kontinua hadia fali kuartu rua seluk.

Nia esplika, sira nia uma laos bee maka hoban, maibe mota maka tama, tanba nee lori hotu sasan, no estraga hotu janela no odamatan, iha mos dokumentus balu mota lori, maibe agradese tanba sira nia aan salva husi situasaun nee.

Nunee tuir nia katak, sira hadia deit ona hodi hela, tanba se garante ba estadu maka hadia sei lori tempu naruk, tanba konaba apoiu neebe rejistu ona naran atu hetan, too agora deit seidauk hetan.

Maibe durante nee, sira hetan ona apoiu hahan husi Igreja Dom Bosco, juventude bairo nian, partidu PD, no Madre sira, maibe husi parte governu nian seidauk.

Nunee nia parte husu, atu apoiu neebe mai husi nasaun liur atu fahe ba ema neebe hetan inundasaun, tenke fahe hanesan. Tanba oras nee dadaun balu hetan apoiu ona, maibe balu seidauk hetan.

Tuir observasaun STL nian katak, uma sira neebe pertense ba iha mota Comoro ninian, hetan estragus husi inundasaun. Oras nee dadaun komunidade barak maka komesa hadia ona, no muda mai hela ba.

Tanba tuir informasaun neebe iha katak, komunidade sira neebe evakua husi fatin inundasaun nee, balu ba hela iha Dom Bosco, maibe balu ba hela iha kos.*

Reportajen: Terezinha de Deus
Editora: Domingas Gomes

LEAVE A REPLY

Please enter your comment!
Please enter your name here

NEWS UPDATE

URA Feto Sempre Apoiu Mane

DILI, STLNEWS.co – Tempu difisil feto sempre apoiu mane iha luta ba Ukun Rasik An (URA), ikus hetan independensia, kontribuisaun konta hotu feto ho...

Loron Ba Loron Jose Nia Rendimentu Menus

DILI, STLNEWS.co – Negosiante Jose Nascimento Nunes, neebe faan ropa obralan iha area Bairru Pite, sente triste ho situasaun pandemia Covid- 19 nee, tanba...

Kandidatu An PR, Tenke Hatene Linguistika

DILI, STLNEWS.co – Jurista Timoroan Sergio Dias Quintas dehan, individu neebe hakarak kandidatu ba Prezidente Republika (PR), tenke hatene linguistika no labele sai opozisaun. "Primeiru,...
%d bloggers like this: