DILI, STLNEWS.co – Oras nee daudaun konsumidor iha area remotas, Postu Administrativu Zumalai, Munisipiu Kovalima, halerik ba folin foos neebe kontinua sae, fo influensia ba povu kbiit laek sira neebe ho rendimentu naton.
Preokupasaun nee hatoo husi Marito Barros, hanesan konsumidor husi Suku Zulo, Aldeia Lale, Postu Administrativu Zumalai, Munisipiu Covalima, ba STL liu husi telefone, Kuarta nee (27/09/2023).
“Konaba folin foos iha nee la tun, kontinua sae, foos 20 kg ema faan iha bazar, iha loron segunda, nee presu US$ 15, maibe ema faan iha kios nee 20 kg ho folin U$ 16.50, agora fos 25 kg ema faan iha merkadu US$ 18.50, maibe faan iha kios mak ami sosa, nee US$ 22,” dehan nia.
Marito dehan, governu presiza normaliza folin foos, tanba povu neebe kbiit naton sosa labele, tanba folin foos too agora la tun no sae nafatin, tanba saida mak folin foos sae nafatin, nee kauza husi selu taxa mak folin sae nunee ka oinsa.
“Mina 5 liter ho folin US$ 8.50, ami senti folin nesesidade baziku, liu-liu foos ho mina, iha area remotas nee sei kontinua sae nafatin,” dehan nia.
Nunee mos Santina Moniz hanesan konsumidor dehan, folin foos sei kontinua sae, no fo influensia ba komunidade neebe mak kbiit naton sosa labele, tanba foos nee too agora presu sae nafatin.
“Uluk ita lori osan US$ 20 sei sosa foos karon ida ho mina 5 liter, maibe agora lae, ita tenki prepara osan US$ 30 nunee mak foin sosa foos ho mina,” tenik nia.
(jac)
