Kredit Macet Aas Iha BNCTL

Diretor Ezekutivu ou CEO BNCTL, Brigido de Sousa. (Foto: STL/Natalina Lopes)

DILI, STLNEWS.coKredit macet ka (Kreditu Mall paradu) aas tebes iha Banku Nasional Comersiu Timor Leste (BNCTL). Hahu 2018 sae ba 4% maibe iha 2019 tun ba 2.5%.

Too iha loron 2 fulan Outobru 2020, kreditu mall paradu neebe BNCTL rejista hamutuk 2.62%, kauza husi kreditu mall paradu tanba TL hasoru hela situasaun defisil no kreditor sira barak mak la selu sira nia obrigasaun ba banku.

“Hau hanoin tuir estandar internasional kreditu mall paradu labele liu 5%, maibe BNCTL la konsege liu ida, tan nee iha sutusaun defisil hanesan nee banku mantein kreditu Mall paradu nee la liu 3%, nee hanesan edforsu boot ida tanba bele hatudu rejultadu neebe diak, tan nee husu kliente BNCTL sira atu kompromitidu hodi selu sira nia obrigasaun ba banku maske situsaun defisili,” kestaun nee fo sai husi Diretur Ezekutivu/CEO BNCTL Brigido de Sousa ba STL Kuarta (07/10/2020) iha nia knaar fatin Timor Plaza.

Nia mos afirma liu tan katak, iha 2018 kreditu mall paradu sae makas iha BNCTL, tanba projetu sira neebe maka kompania sira halo hotu tiha, governu la halo pagamentu, nunee setor privadu sira nneebe hetan kreditu husi banku hodi halo projetu, komete iha kreditu mall paradu, tanba dadus neebe iha kreditu mall paradu barak liu mai husi setor privadu sira nomos maluk sira neebe halo negosiu.

“Hau hanoin kreditu mall paradu nee normal, tanba ita nia kompania sira no negosiu kiik sira nee mos, sofre ba situsaun neebe lao iha rai laran, rendimentu povu kiik nian laiha, kompania finaliza projetu governu la halo pagamentu, no durante nee governu lao deit ho osan duodesimu, projetu foun laiha, tanba nee fo impaktu mos ba atividade hotu neebe lao iha rai laran,” esplika CEO BNCTL Brigido.

Nia relata katak, kliente barak maka la selu kreditu tuir akordu neebe iha, tanba deit rendimentu menus tan nee sira nafatin loron osan nee hodi halo sira nia negosiu, no osan neebe lolos sira atu selu ba banku nee, sira tenke hola fali sasan ba faan hodi hetan netik rendimentu.

Veteranus Hein Prosesu
Iha biban nee CEO BNCTL nee husu ba Veteranus sira neebe hatama ona dokumentus atu asesu ba kreditu pasensia hein, labele hanoin dokumentus hatama loron ida rua, osan sai ona.

“Veteranus sira nia hakarak nee, ohin hatama dokumentus, bain rua osan tenke sai ona, tan nee atu klarifika deit katak banku la atende veteranus deit, maibe atende mos kliente sira seluk neebe hakarak kreditu, tan nee veteranus sira nia dokumentus hatama ohin no fulan oin maka bele simu osan, tanba buat hotu tenke haree mos ba kriteria banku nian,” relata Brigido.

Nia afirma liu katak, knaar BNCTL nia maka atu fo atendimentu neebe diak ba nia kliente sira hotu, BNCTL la atende deit Veteranus sira, maibe BNCTL atende mos negosiu kiik sira, setor privadu sira, funsionariu publiku no sira seluk neebe hakarak atu asesu ba kreditu iha banku, tan nee husu ba veteranus sira atu pasensia uituan hodi hein, karik dokumentus tama ona iha banku maka, bele hein too fulan oin, tanba banku tenke haree didiak maka bele prosesa, laos hatama ohin bain rua simu osan.

Nia informa kreditu ba veteranus sira nee numeru sae makas tebes, kuaze kinentus mill no too Outobru 2020, kreditu neebe BNCTL fo ba veteranus sira besik tokon $13 ona, maibe BNCTL nafatin fo kreditu ho funan neebe kiik 6% deit, karik seguru maka bele 5% deit, tanba nee jurus ba veteranus sira nee kiik tebes, kompara ho sira seluk la hanesan, Veteranus sira banku fo jurus kiik, tanba veteranu espesial.

Iha parte seluk Emprezariu Timoroan, Lucio Gomes dehan, setor privadu barak maka durante nee asesu kreditu iha banku sira neebe establese iha rai laran, no setor privadu sira ba kreditu tanba atu finaliza obra balun, maibe finaliza tiha governu la selu too agora, tanba nee banku nia tusan ba setor privadu sira kontinua aumenta.

“Ita haree projetu 143 neebe tama iha lista pagamentu, too agora governu selu balun deit, balun governu la selu, ho razaun osan seidauk iha, tanba nee banku nia tusan ba setor privadu sira kontinua aumenta, tanba governu la kumpri nia desizaun atu selu setor privadu sira,”dehan nia.

Iha parte seluk Norberto Gomes(Veteranus) hatutan prosesu atu asesu ba kreditu nee kleur tebes, maske veteranus sira mai ho dukumentu kompeltu, maibe prosesamentu iha banku maka klaeur.

“Ami nafatin kumri desizaun banku nian, katak hatama dukumentu kompletu ba iha banku hodi hein nia prosesu tan nee hanesan kliente ami nafatin hein, maibe labele too fulan rua tolu, tanba ami mai ho dukumentus kompletu, tan nee labele haruka ami hein kleur,”dehan nia nee.*

Reportajen: Madalena/Jacinta /Natalia
Editor: Ekipa STL

LEAVE A REPLY

Please enter your comment!
Please enter your name here