La Hasae Presu Iha Loron Boot

Tama loron boot natal no tinan foun, loja iha Munispiu kontinua sosa sasan iha armajen perissos, maibe sira sei la hasae presu no faan ho folin neebe normal. (Foto: STL/Jacinta Sequeira)

DILI, STLNEWS.co – Tama loron boot natal no tinan foun, loja iha Munispiu kontinua sosa sasan iha armajen perissos, maibe sira sei la hasae presu no faan ho folin neebe normal.

Francisco Hornai, hanesan loja nain nelfen, husi Munisipiu Liquisa Maubara hatete, bimoli ho sasan sira seluk nee presu lao hanesan bai-bain, maibe rendimentu menus tebes, tanba kada loron konsumedores ladun sosa sasan.

“Fos hirak neebe mak ami sosa iha nee, ho folin US$ 12 dolar 50 cent, ami ba faan fali ho folin US$ 14 dolar, nee fos 20 kg, ami ba faan fali ho presu US$ 14 dolar, hau hanoin ida nee ninia presu normal, hau hanoin uluk nee fos 25 kg nee ho presu US$ 13 dolar 50 cent. Ami nia rendimentu durante nee, kada loron ami sente menus tebes, kompara ho tinan hirak liu ba, tanba kada loron nee, ami hetan deit US$ 40 dolar no US$50, maibe seidauk Covid-19 ami nian rendimentu kada loron nee menus tebes. Hau hanoin kona ba presu, hau sente sei normal hela hanesan bai-bain,” dehan Francisco ba STL, iha armajen Perrisos Fatuhada, Dili, Kuarta (09/12/2020).

Francisco akresenta, maski rendimentu kada loron nee menus, maibe sira kontinua mai sosa nafatin sasan iha armajen Perrisos, liu-liu fos neebe mak sira faan.

“Atu tama loron boot natal no tinan foun, ami kontinua mai sosa nafatin sasan iha fatin ida nee, para ami bele ba faan fila-fali iha ami nian Munisipiu, presu nee tenke normal hanesan bai-bain, tanba iha autoridade neebe mak sempre halo kontrolu ba presu sasan sira nee,” dehan nia.

Nia sublina, sasan sira neebe mak sira faan iha Munisipiu, depende ba ninia presu neebe mak sira sosa iha armajen, tanba nee, ninia presu mos sei haree ba folin sasan neebe mak sira sosa iha armajen, sekarik iha armajen ninia presu sae, entaun sira mos faan tuir ida nee, tanba sira sura ho transporte neebe mak sira uja tula sasan ba iha Munisipiu.

“Hau sente presu nee ita haree ba iha armajen uluk lai, neebe ita mos labele hasae fali folin, entaun ita tenke faan sasan neebe normal, tanba ita hatene katak, ho situasaun covid-19 ema barak laiha servisu, no ema laiha osan atu sosa sasan neebe mak ita faan,” nia dehan.*

Reportajen: Jacinta Sequeira

Editora: Carme Ximenes

LEAVE A REPLY

Please enter your comment!
Please enter your name here