La Prepara Kupon, Benifisiariu Kestiona Servisu MTCI

Kupon ba sesta bazika seidauk prepara ba benifisiariu sira, tanba nee benifisiariu husi Aldeia 5 de Outubru, Suku Bairru-Pite, Postu Administrativu Dom Aleixo, kestiona servisu Ministeriu Turismo, Comersiu, no Industria (MTCI), tanba servisu la ho professional. (Foto: STL/Jacinta Sequeira)

DILI, STLNEWS.co – Kupon ba sesta bazika seidauk prepara ba benifisiariu sira, tanba nee benifisiariu husi Aldeia 5 de Outubru, Suku Bairru-Pite, Postu Administrativu Dom Aleixo, kestiona servisu Ministeriu Turismo, Comersiu, no Industria (MTCI), tanba servisu la ho professional.

Lamentasaun nee, hatoo husi Moises Vasconselhos, hanesan benifisiariu Aldeia 5 Outubru ba STL, iha fatin distribuisaun sesta bazika Aimutin, Dili Tersa (16/02/2021).

Nia dehan, karik ekipa ida nee mak la hatene servisu, entaun hasai tiha, tanba inan feton sira neebe mak faan sasan iha merkadu, no maun alin sira neebe dudu gerobak iha dalan, ohin loron lakon tempu, tanba deit sesta baziku.

“Hau nuudar sidadaun ida atu mai simu sesta bazika, neebe governu promete ona katak, sidadaun hotu, tenke hetan ajuda husi governu, tanba ida nee, hau mai iha fatin ida nee, tanba hau simu lia menon husi xefi aldeia katak, loron ida nee duni, ami husi aldeia 5 de Outubru mai iha fatin ida nee, para hetan direitu ida nee, maibe ami hein komesa tuku 7, too tuku 11 Diretor Jeral MCTI nian mai too iha nee katak, husu diskulpa katak, ekipa neebe servisu toma konta ida nee, iha fallansu, hau nuudar populasaun hau sente triste teb-tebes, tanba Deskulpa la too husu ba komunidade iha aldeia ida nee, servisu hanesan nee, nusa horiseik ekipa la fo hatene katak, loron ida nee mak bele mai,” dehan Moises.

Iha fatin hanesan, Lidia Maria Guterres, hanesan banifisiariu husi aldeia 5 de Outubru hatete, ohin mai atu simu sesta bazika, maibe ohin husi parte MTCI nian mai fali dehan kupon laiha, tanba nee, atu dehan katak, iha Ministeriu neebe prepara kupon nee, seidauk iha responsabilidade neebe mak diak ba iha servisu ida nee.

“Ohin ami mai atu simu sesta bazika, maibe oras hanesan nee mak parte husi MTCI nian mai dehan, kupon seidauk prepara, entaun ema ida servisu ba ida nee, ninia servisu la ho responsabilidade neebe diak,” nia informa.

Hatan ba preokupasaun nee, Direitor Jeral Industria, Vise Koordenador Jeral sesta bazika, asuntu operasionais (MTCI), Carlos Ximenes hatete, atu fo informasaun ruma katak, ohin mosu dezentendementu uituan, tanba faila husi ekipa tekniku MTCI, la fo informasaun ba komunidade, liu-liu autoridade lokal sira, ho nunee ohin bele halo distribuisaun, maibe kupon mak seidauk preparadu, atu nunee bele atende komunidade sira.

“MTCI hanesan ajensia implementador, neebe trata asuntu kupon iha Dili laran tomak, ami konsente katak, iha failansu nee ami tenke mai fo hatene ou informa ba maluk sira neebe desde ohin dader mai iha nee, preparadu atu simu, maibe ami tenke fo hatene failansu ida nee ba sira, tanba kupon sira nee seidauk preparadu, entaun ami ho intensaun diak, atu fo hatene sira, para sira fila-fali ba uma, para hein fali avizu husi xefi aldeia sira, maibe hau rasik sei halo atende ida nee ho diak, maibe de faktu maluk balun nerbozu, iha nee ami ho xefi suku sira mos iha nee, inklui polisia, ami fo esklaresementu neebe diak,”
katak nia.*

Reportajen: Jacinta Sequeira/Madalena Horta
Editor: Ekipa STL

LEAVE A REPLY

Please enter your comment!
Please enter your name here