Labele Haree Setor Privadu Hanesan Oan Kiak

Diretor Ezekutivu SERVE, Florencio Sanches. (Foto: STL/Jacinta Sequeira)

DILI, STLNEWS.co – Servisu e Rejistu Verifikasaun Emprezarial (SERVE), konsidera setor privadu hanesan parseiru dezenvolvimentu no labele haree fali setor privadu hanesan oan kiak iha rai ida nee. Dehan Diretor Ezekutivu SERVE, Florencio Sanches ba STL, iha nia knar fatin SERVE Hudi Laran, Dili Tersa (16/02/2021).

“Agora dadaun ita presiza osan no osan neebe mak iha tanba nee SERVE sempre hatete katak, mai ita haree setor privadu nee hanesan parseiru dezenvolvimentu, ita labele haree fali setor privadu hanesan oan kiak iha rai ida nee, hau hanoin ida nee la diak, tanba sira nee mak sei ajuda estadu no governu, hodi ezekuta orsamentu tinan-tinan, iha nasaun barak, foti setor privadu hanesan liu rai, hanesan familia rasik, atu nunee apoiu estadu hodi dezemvolve ekonomia iha rai laran,” dehan Florencio.

Nia hatutan, kompania boot sira neebe hakarak mai, sira nian regras interna kompania ninian, sira halo vizita ofisial ida mai TL, para atu bele haree didiak, tanba sira mos asesu ba internet haree tiha ona, sira hakarak mai vizita TL, ida nee sira labele halo, tanba aeroportu taka.

“Komunikasaun liu husi telefone ami halo komunikasaun nafatin katak, sei bele ka lae, liu-liu kompania internasional neebe atu halo investimentu iha area turismo, agrikultura, mina no gas, tanba sira iha intrese boot teb-tebes, neebe hein katak, sekarik sira buka meus halo pedidu tama mai,” nia hatete.

Florencio afirma kompania seluk atu halo investimentu iha area konstruksaun ninia, ida nee TL presiza teb-tebes tanba ho investimentu nunee diak liu fo liman ba malu para loke odamatan, sekarik sira investe ou produs ba material konstruksaun ninia, hanesan pregu no seluk tan, ida nee diak liu tan, duke hatama husi rai liur, neebe ohin loron defisil teb-tebes.

Nia dehan, oinsa mak atu bele fo apoiu nafatin ba setor privadu sira iha rai laran, maske dadaun nee iha faze EE nian laran, maibe kompania internasional sira husi liur, sempre halo kontaktu nafatin ho parte SERVE ninia, oinsa mak sira hakarak mai halo investimentu iha rai laran, tanba liu husi sira nian investimentu neebe atu halo, bele kria mos kampu servisu ba Timor oan sira.

“Ita hein katak, kompania internasional sira sei mai nafatin halo investimentu iha rai laran, tanba sira mos durante asesu informasaun liu husi media eletronika, agora sira atu mai nee mak oinsa, maibe ita nia kontaktu ho sira kontinua lao nafatin,” katak nia.

Iha fatin hanesan, Diretor kompania Neol Unip.Lda, Emanuel A.R. Soares hatete, ho situasaun Covid-19 ida nee investedor sira mos atu mai iha TL, sira haree ba nasaun hotu taka nian aeroportu, depois kompania internasional neebe durante nee halo investimentu iha rai laran, too situasaun nunee fila ba sira nian rai.

“Hau hanoin iha situasaun Covid-19, hanesan kompania nasional, ami infrenta problema finanseiru, tanba osan laiha, ida nee mak defikulta ami,” nia dehan.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here