Lakonkorda Transporta Estudante Ba Foho, Angelina: Governu Intervein Lalais

Deputada Bankada PLP, Maria Angelina Lopes Sarmento. (Foto: STL/Domingas Soares)

DILI, STLNEWS.co – Relasiona ho inan aman balu husu transporta oan sira ba foho, tanba tauk hahan menus, Deputada Maria Angelina lakonkorda, tanba nee husu governu atu halo intervensaun imediata ba nesesidade estudante iha kost.

Tuir Deputada PLP atual Primeira Vice PN, Maria Angelina Lopes Sarmento katak, estudante sira agora laos feriadu, maibe suspende deit sira nia prosesu ka atividade aprendizajen, tanba nee suspende lahanesan ho feiras. Neebe suspende katak bele mos aulas lao nafatin ho maneira oinseluk, hanesan online, professores fahe grupu, semana nee ekipa ida no semana seluk ekipa ida atu estuda materia neebe iha. Tanba nee governu tenke intervein lalais ba nesesidade estudante.

“Agora eskola laos ferias, tuir loloos sira nia prosesu aprendizajen lao hela, maibe tanba covid mak suspende, maibe iha eskola balu meius ba prosesu aprendizajen balu iha, tanba universidade barak mak ho meius online, tanba nee hau lakonkorda atu transporta estudantes fila ba foho, maibe governu mak tenke buka meius hodi intervensaun imediata ba estudante sira,” katak Angelina ba STL, Sesta (26/03/2021) iha PN.

Nia dehan, kuandu sira ba foho, mak lina internet defisil sei defikulta liu tan sira nia moris, tanba nee presiza governu halo intervensaun imediata, atu nunee labele transporta estudante sira fila ba foho. Estudante sira nee nafatin hela iha Dili, atu nunee governu mak tenke haree ba nesesidade neebe sira presiza.

Nia afirma, haree ba situasaun neebe akontese ita haree semana hira liu ba iha ona grupu estudante voluntariu sira organiza malu hodi fo apoiu ba estudante maluk sira neebe hela iha kost. I nunee mos Ministeriu Solidaridade Sosial mos distribui fos ba estudante sira.

Maibe tuir nia, ida nee la too tanba haree sosiedade ida nee laos estudante mesak mak hasoru problema, maibe haree ba ema sira neebe lori kareta mikrolete, taxi, faan modo, faan pulsa nee afetadu hotu ba serka sanitaria.*

Reportajen: Guilhermina Franco/Domingas Soares
Editor: Ekipa STL

LEAVE A REPLY

Please enter your comment!
Please enter your name here